-Юуны өмнө Ази тивийн аварга болсонд баяр хүргэе. Тэмцээнийхээ талаар сонирхуулахгүй юу?

 

-Баярлалаа. Энэтхэг улсын Удапур хотод энэ сарын 7-12-нд Пауэрлифтингийн Азийн тивийн аварга шалгаруулах 32 дахь удаагийн тэмцээн боллоо. Энэ тэмцээнд манай Пауэрлифтингийн холбооны зургаан тамирчин оролцож, 120 кг жинд нэг алт, 59 кг жинд нэг хүрэл медаль, насанд хүрэгчдийн 83 кг, -120кг жинд мөнгөн медаль хүртсэн. Нийт нэг алт, нэг хүрэл, гурван хүрэл медалийн амжилт үзүүллээ.

 

Азийн аваргад Монгол Улсаа төлөөлж явсан тамирчдын тав нь амжилттай оролцож, медальт байрт шалгарсан. Энэ бол маш том амжилт юм. Би хувьдаа манай пауэрлифтингийн тамирчид багаараа маш сайн, амжилттай оролцсон гэж бодож байгаа.  Би 120 кг жинд алтан медаль хүртэж, Пауэрлифтингийн 32 дахь удаагийн Азийн аварга болсон. Азийн аварга болсондоо маш их баяртай байна. Пауэрлифтингийн азийн аварга болсон нь зөвхөн миний хичээл зүтгэлийн үр дүн биш. Энэ амжилтыг гаргахад Монголын Пауэрлифтингийн холбоо, манай клубын хамт олон маш их тусалж, дэмжсэн. Бүгдэд нь баярлалаа. 

 

-Анх удаагаа олон улсын тэмцээнд оролцсон. Өндөр амжилт гаргалаа шүү дээ?

 

-Миний хувьд олон улсын чанартай тэмцээнд анх удаагаа оролцсон. Өмнө Улсын аварга шалгаруулах тэмцээнд л оролцдог байлаа. Анх удаа олон улсын тэмцээнд оролцож, амжилт гаргасан учраас баяртай байна. Олон улсын анхны тэмцээн байсан учраас их сандарч бас догдоллоо.

 

-Өрсөлдөгчид хэр байсан бэ?

 

-Өрсөлдөгчид их хүчтэй байсан. Бусад орны тамирчид бэлтгэл их сайтай юм билээ. Ялангуяа Казак, Иран, Тайван зэрэг орны тамирчид хүчтэй өрсөлдөгч байлаа. Учир нь пауэрлифтингийн спорт өөрөө их хүч шаарддаг. Тийм болохоор ч юм уу жүдо хөгжсөн орны тамирчид сайн байсан. Тэр дундаа Казак улсаас ирж оролцсон тамирчид их хүчтэй. Олон улсын чанартай анхны тэмцээн байсан учраас өрсөлдөгчдөө судлахын зэрэгцээ, туршлага их хуримтлуулсан.

 

-Тухайн орны цаг уур, амьдрах хэв маягаас хамаарч улс орон бүрийн тамирчид нэг онцлог давуу талтай байдаг. Манай улсын тамирчид бусад орны тамирчидтай харьцуулахад юугаараа давуу талтай байв. Анзаарч харсан байх?

 

-Пауэрлифтингийн Азийн аварга шалгаруулах тэмцээнд оролцож байхдаа нэг зүйлийг анзаарч байлаа. Тэр нь юу гэхээр, манай орон яалт ч үгүй бөхийн орон юм байна гэж бодогдсон. Эрийн гурван наадамд нь хүртэл бөх ордог шүү дээ. Манай тамирчид үнэхээр бяртай, тэнхээтэй юм билээ. Бөхийн удамтай, бөхийн орны тамирчид учраас ийм бяр, тэнхээтэй байдаг болов уу гэж бодсон. Бусад орны тамирчдаас ялгагдах гол зүйл нь гэвэл тэр.

 

Мөн тамирчдыг хат суухад тухайн үндэстний амьдралын хэв маяг, байгаль орчин, цаг уурын байдал ч гэсэн нөлөөлдөг. Манай орон жилийн дөрвөн улиралтай. Зун нь нэг их халаад, өвөл нь их хүйтэрдэг.

 

Энэ нь ч гэсэн тамирчдыг бяр тэнхээтэй болоход тодорхой хэмжээгээр нөлөөлдөг болов уу гэж бодсон. Мөн аливаа амжилтад хүрэхэд тухайн тамирчны хичээл зүтгэл маш чухал. Мянга бяр тэнхээтэй, бөхийн удамтай байлаа ч гэсэн хүчээл зүтгэл гаргаж, бэлтгэл сургуулилтаа сайн хийхгүй бол явахгүй. Манай тамирчид бэлтгэл сайн байсан. Үнэхээр бяртай тэнхээтэй юм билээ. Тэр нь ч гэсэн гаргасан амжилтаас нь харагдах байх. Казак, Иран, Тайван улсын тамирчидтай эхний байруудын төлөө л өрсөлдлөө. Ер нь манай тамирчдын бусад орны тамирчдаас ялгагдах давуу тал нь гэвэл илүү бяртай л гэж хэлнэ.

 

-Монголын Пауэр­лифтингийн спортын хөгжил олон улстай харьцуулахад аль төвшинд байна вэ. Анх удаа олон улсын тэмцээн оролцсон. Гадаадын тамирчдаас туршлага судалсан хүний хувьд харьцуулалт, дүгнэлт хийсэн байх?

 

-Манай пауэрлифтингийн тамирчид маш өндөр амжилт гаргадаг болсон. Ер нь Ази тивдээ маш дээгүүр өрсөлддөг тамирчдын тоонд ордог. Одоо бол Иран, Казак Тайван зэрэг орны тамирчидтай эхний байрын төлөө өрсөлддөг болсон. Тэгэхээр тамирчдын гаргасан амжилтуудаас Монголын пауэрлифтингийн спортын хөгжил аль төвшинд байгааг харж болох байх.

 

Тухайлбал, 2014 онд Москвад болсон Дэлхийн аварга шалгаруулах тэмцээний 140 кг жинд Спортын мастер, Баянзүрх дүүргийн Биеийн тамир спорт хорооны дарга Д.Анхбаяр аваргалсан. 2014 дэлхийн аваргын тэмцээнд нийт 18 орны 1800 гаруй тамирчид оролцож байсан. Д.Анхбаяр тэр тэмцээнээс нэг алт, хоёр мөнгөн медаль хүртэж, дэлхийн аварга болж байлаа. Мөн 2014 олон улсын хэмжээний мастер М.Батбаяр 100 кг жинд дэлхийн аварга болсон.

 

М.Батбаяр Ази тивийн аварга шалгаруулах тэмцээний мөнгөн медальт, Улсын аварга шалгаруулах тэмцээний алт, мөнгө, хүрэл медальтай. Эндээс манай улсын пауэрлифтингийн спортын хөгжил аль төвшинд байгаа нь харагдах болов уу. Монгол Улсад пауэрлифтингийн спортын Азийн аваргууд байна.

 

Бүр дэлхийн аваргууд ч байгааг харж болно. Пауэрлифтингийн спорт Монголд хөгжиж байна. Гэхдээ энэ спортыг залуучуудад илүү таниулах хэрэгтэй. Тэгэхийн тулд төрөөс тодорхой хэмжээгээр дэмжих ёстой. Сая болсон Азийн аварга шалгаруулах тэмцээнд ч гэсэн манай тамирчид амжилт үзүүллээ. Тухайлбал, Олон улсын хэмжээний мастер М.Батбаяр 93 кг жинд мөнгөн медаль, 83 кг жинд Б.Гансүх мөнгөн медаль хүртсэн. Пауэрлифтингийн тамирчид маш амжилттай байгаа. 

 

-Та аль клубт харьяалагддаг вэ. Бэлтгэл сургуулилтаа хаана хийдэг вэ. Сая бэлтгэл нэлээд сайн байсан бололтой?

 

-Би Багануур дүүргийн Боловсрол цогцолборт багшилдаг. Биеийн тамирын багш мэргэжилтэй. Багануур дүүргийнхээ  спорт хороо, “Уурхайчин” клуб, “Хөх дөрвөлжин” клубт бэлтгэл сургуулилтаа хийдэг. Улсын аварга шалгаруулах тэмцээнээс олон улсын тэмцээний эрх авдаг учраас маш сайн бэлдэж ордог.

 

Бэлтгэлийг боломжоороо сайн хийсэн. Ер нь тэмцээн уралдаан дөхсөн үед өдөр болгон шахуу бэлтгэл хийнэ. Би аливаа спортын амжилт бэлтгэл сургуулилтаас их шалтгаалдаг гэж боддог. Мэдээж сайн хөдөлмөрлөвөл тэр хэмжээгээр сайн үр шим хүртэнэ шүү дээ. Тиймээс бэлтгэл чухал.

 

-Багш мэргэжилтэй хүн пауэрлифтингийн спортоор хичээллэх болсон түүх сонин байна. Яагаад энэ спортыг сонгож хичээллэх болсон юм бэ?

 

-Пауэрлифтингийн спорт Монголд хөгжиж эхлээд 10 гаруй жил болж байна. Би анх 2005 оны улсын аварга шалгаруулах тэмцээнийг үзэж байсан юм. Тэр тэмцээн хамгийн анхны улсын аварга шалгаруулах тэмцээн л дээ. 2005 оны улсын аварга шалгаруулах тэмцээнийг үзэж байхад пауэрлифтингийн спорт надад маш их таалагдсан.

 

Ёстой л эр хүний шандас шалгасан спорт шиг санагдаж билээ. Одоо ч гэсэн тэр тэмцээн нүдэнд харагддаг. Тэгээд л пауэрлифтингийн спортоор хичээллэхээр шийдсэн. Биеийн тамирын багш мэргэжилтэй болохоор бэлтгэл сургуулилтаа хийхэд ч гэсэн дөхөм юм шиг санагдсан. 2006 оны улсын аварга шалгаруулах тэмцээнд оролцсон цагаасаа хойш пауэрлифтингийн спорттой амьдралаа холбосон доо.  

 

-Хүмүүс ихэвчлэн пауэр­лифтингийг бодибилдингийн спорттой андуурдаг. Энэ хоёр спорт хоорондоо ямар ялгаатай юм бэ. Энэ талаар тайлбарлаж өгөхгүй юу?

 

-Тийм. Ихэнхи залуус пауэрлифтингийн спортыг бодибилдингийн спорттой андуураад байдаг. Энэ бол цэвэр хүчний спорт. Ер нь шахалт, суулт, таталт гэсэн гурван төрөлтэй. Төрлүүдийнхөө нийлбэрээр дүнгээ гаргадаг. Бодибилдингээс ялгарах онцлог нь гэвэл хүчээрээ өрсөлддөг л спорт юм.  Ер нь манай улс бөхийн орон гэдэг утгаараа тамирчид маань хүч чадлаараа илүү санагддаг.

 

-Пауэрлифтингийн спорт их өртөг өндөртэй юм шиг санагддаг. Хувцас хэрэглэлээс эхлээд л олддоггүй юм шиг байна лээ?

 

-Нэг үеийг бодвол пауэрлифтингийн спорт хөгжсөн. Өмнө хувцас хэрэглэл олдохгүй байх тохиолдол гардаг байлаа. Одоо харьцангуй гайгүй болсон. Нэг их зориулалтын хувцас олдохгүй байна гээд байх зүйлгүй.

 

-Пауэрлифтингийн Азийн аварга шалгаруулах 32 дахь удаагийн тэмцээнд оролцохдоо зардлаа өөрсдөө гаргав уу. Хэн нэгний оролцоо байв уу?

 

-Аливаа тэмцээн уралдаанд хэн нэгний дэмжлэггүйгээр оролцох их хэцүү. Тухайн тамирчинд их хэцүү л дээ. Бэлтгэл сургуулилтаа хиймээр байдаг. Гэтэл явах зардлын мөнгө нь бодогдоод тайван ч байж чадахгүй. Монголд Пауэрлифтингийн спортыг тодорхой хэмжээнд дэмжиж, тусалдаг хүмүүс бий. Харин шинжилгээний төлбөр зэрэг зарим зүйлийг холбооноос даасан. Манай пауэрлифтингийн холбоо болон зарим байгууллагууд биднийг дэмждэг шүү.

 

-Биеийн тамирын багш мэргэжилтэй, пауэр­лифтин­гийн тамирчны хувьд хүүх­дүүддээ энэ спортын талаар зааж, сургаж байгаа байх?

 

-Тийм ээ. Мэдээж энэ спортоор хичээллэдэг тамирчин хүн, багш хүний хувьд хүүхдүүдэд зааж, сургалгүй яах вэ. Пауэрлифтингийн спортыг сонирхдог хүүхдүүд бий. Манай Багануур дүүргийн хүүхдүүд энэ жилийн улсын аварга шалгаруулах тэмцээнд оролцсон. Энэ жилээс л эхэлж оролцож байгаа юм. Нэг шавь маань хүрэл медаль хүртсэн. Маш их баяртай байгаа. 

 

-Пауэрлифтингийн спор­тоор хэдэн настайгаасаа эхэлж хичээллэвэл зүгээр байдаг юм бэ?

 

-Пауэрлифтингийн спор­тоор хүүхдүүд ч гэсэн хичээллэх боломжтой. Ер нь сонирхож байгаа хүүхдүүд байвал 16 настайгаасаа эхэлж хичээллэхэд тохиромжтой. Пауэрлифтингийн спортыг сонирхож хичээллэдэг хүүхдүүд бий. 

 

-Та мөрөөдлийнхөө талаар хуваалцахгүй юу. Амжилттай явж байгаа тамирчин хүний хувьд олон зүйлийг хүсч, мөрөөдөж байгаа болов уу?

 

-Тэгэлгүй яах вэ. Олон зүйлийг хүсч мөрөөдөж, дотроо бодож төлөвлөж явдаг. Миний хамгийн эхний зорилго гэвэл Дэлхийн аваргад оролцохыг хүсдэг. Пауэрлифтингийн Дэлхийн аварга шалгаруулах тэмцээн 2018 онд манай улсад зохион байгуулагдах юм. Тэр тэмцээнд л оролцохыг хүсч байна. Мэдээж манай улсад болох учраас надад боломж бий. Зардал мөнгөнөөс эхлүүлээд их боломжтой. Өөрийн оронд болж байгаа учраас сэтгэл санааны хувьд ч сайхан байх болов уу. 2018 оны пауэрлифтингийн Дэлхийн аварга шалгаруулах тэмцээнд оролцох эрх авахын тулд эхлээд улсын аваргад маш сайн оролцох хэрэгтэй. Тэгэхээр надаас бүх зүйл шалтгаална. Тиймээс бэлтгэл сургуулилтаа сайн хийнэ гэж бодож байна. Амжилтаа ахиулж, дэлхийн аваргад оролцохыг л хүсч байна даа.

 

-Монголд хөгжих боломж байна уу?

 

-Манай улсад энэ спорт хөгжих бүрэн боломжтой. Яагаад гэвэл би түрүүнд ч хэлсэн. Монголын залуучууд их бяртай, хүчтэй. Пауэрлифтингийн спорт өөрөө хүчний спорт. Тиймээс манай монгол залуус хичээллэхэд их тохиромжтой. Ер нь бол одоо Ази, Дэлхийн төвшинд гараад ирсэн. Энэ спортоор хичээллэвэл монголчууд амжилт олох боломжтой гэдгийг манай тамирчид харуулж чадлаа. Залуучуудыг энэ спортоор хичээллээрэй гэж уриалмаар байна.

 

-Та энэ спортоор хичээллээд 10 жил болсон гэсэн. Энэ хугацаанд маш их туршлага хуримтлуулсан байх. Пауэрлифтингийн спортоор хичээллэж байгаа залуу тамирчид хэр санагдаж байна вэ. Тэдэнд амжилт гаргах ирээдүй байна уу?

 

-Манай залуус маш их ирээдүйтэй. Бэлтгэл сургуулилтаа маш сайн хийдэг. Өсөх ирээдүйтэй тамирчид их байна. Сая болсон Ази тивийн аварга шалгаруулах тэмцээнд М.Батмөнх гэж залуу 59 кг жинд оролцлоо. Анх удаагийн тэмцээн гэхэд залуучуудын ангиллаас хүрэл медаль хүртсэн. Ер нь манай залуус өөрсдөө хичээж, бэлтгэл сургуулилтаа хийх юм бол амжилт гаргах боломжтой. 

 

-Пауэрлифтингийн спор­тыг хөгжүүлэхэд төрөөс хэр дэмжлэг үзүүлэх юм?

 

-Ер нь пауэрлифтингийн спортыг төрөөс дэмжих хэрэгтэй. Манай тамирчид тодорхой хэмжээнд амжилт гаргаж, Ази, Дэлхийн аваргатай боллоо. Цаашид энэ спортыг хөгжүүлэхийн тулд төрийн оролцоо чухал.

 

-Таньд баярлалаа. Спортын өндөр амжилт хүсье.