Английн премьер лигийн 33 дугаар тойргийн хүрээнд өчигдөр орой хоёр тоглолт боллоо. Энэ тойрогт хүснэгтийг тэргүүлэгч “Челси” клуб топ дөрөвт багтахын төлөө өрсөлдөж буй “Манчестер Юнайтед”-ын талбайд зочиллоо. Энэ тоглолтод талбайн эзэд гайхалтай байж, өрсөлдөгчөө 2:0-ээр буулгаж авсан юм. Ингэснээр 60 оноотой болж, тавдугаар байрт бичигдэж байна. Дээрээс нь хоёр тойргийн тоглолт дутуу байгаа.

Харин “Челси” хожигдсон ч гэсэн 75 оноотой хэвээр үлдэж, тэргүүн байраа хадгалж байгаа билээ. Гэхдээ араасаа нэхэж буй “Тоттенхэм”-ээс ердөө 4 онооны зөрүүтэй болж ирээд байна. Тоглолтын 7 дахь минутад Маркус Рэшфорд тооны харьцааг нээсэн. Улмаар 49 дэх минутад Андер Эррера гүйцээснээр багтаа хэрэгтэй гурван оноог авчирчээ.

Энэ тойрогт “Ливерпүүл” клуб “Вест Бромович”-ын талбайд зочилж, 0:1-ээр буулгаж авлаа. Ингэснээр 66 оноотой гуравдугаар байрт бичигдэж байна. Тоглолтын хувь заяаг шийдсэн цорын ганц гоолыг 45 дахь минутад Фирмино оруулжээ. Ингэснээр тэрбээр премьер лигт 11 гоолтой болж ирлээ.