Япон Улсын хамтын ажиллагааны Жайка байгууллага, Монгол Улсын БСШУСЯ, Японы Токиогийн техноло­гийн сур­гууль, МУБИС хамтран “Хөдөө­гийн бага боловсролын чанарыг ахиула­хад мэдээллийн харилцааны технологийг оновчтой ашиглах нь” төслийг 2012-2017 онд хэрэгжүүлжээ. Энэхүү төслийн гол зорилго нь “Суралцахуйг дэмжих арга зүйг дэмжин хөгжүүлэх нь сургалтын чанарт нөлөөлж улмаар сурагчдын сурах үйл явцад нөлөөлөх” юм. Хөдөөгийн бага ангийн багш нарын мэдлэг боловсролыг дээш­лүүлэх зорилгоор мэдээл­лийн харилцааны техно­логийг ашиглах, улмаар орон нутгийн дижитал сургалтын материал боловсруулан сургалтдаа ашиг­лах ур чадварыг эзэмшүүлэх зорил­го­той уг төсөл амжилттай хэрэгжиж дууссан байна.

Төслийн талаар Токиогийн технологийн сургуулийн профессор Юмэ Ямагучи “Төсөлд хамтран ажилласан бүх хүнд баяр хүргэхийг хүсч байна. Энэ төсөл анх 2012 онд хэрэгжиж эхлэхэд ЖАИКА-гийн мэргэжилтэн Ивай энэ төсөл Монгол орон даяар шинэ давлагаа бий болгоно хэмээж байсныг би тодхон санаж байна. Өнөөдөр бид, төслийн гишүүд, багш нар, сургуулийн удирдлагууд, мэргэжилтнүүд нар мэдээллийн харилцааны технологийг багшлах болон сурах үйлдээ нэвтрүүлж байгаагаар энэ давлагааг бий болгож чадсан гэдэгт итгэлтэй байна.  Монгол орны боловсролын салбарт 1990-ээд онд бий болсон шилжилтийн үр дүнд сургуулиуд мөн хүндрэлтэй тэр үеийг даван туулж байсан тэр өдрүүдэд багш нар Монгол орны өнцөг булан бүрт өндөр хөгжилтэй технологи ашиглан чанарын өндөр хэмжээнд өөрсдийн сургалтын материалаа бэлтгэх сайхан өдөр ирнэ гэдэгт итгэл дүүрэн байсан юм. Итгэл нь биелэл болоход энэхүү төслийн үйл ажиллагаа, үр дүн багш нарыг улам зоригжуулсан.

Цаашид Монгол орны боловсролын байгууллага, сургуультай үргэлжлүүлэн хамтран ажиллах чин хүсэлтэй байгаагаа үүгээр уламжилж байна. Багш хүний хувьд миний сурган хүмүүжүүлэх хөдөлмөрийн түүхийн хамгийн дурсамжтай мөчүүд Монголын багш нартай хамт байсан шүү” хэмээв. Төслийн талаар МУБИС-ийн Сургалт, хамтын ажиллагаа эрхэлсэн дэд захирал, доктор профессор Х.Тамир “МУБИС маань Токиогийн технологийн сургуультай хамтарч энэхүү төслийг 2012-2017 оны хугацаанд хэрэгжүүлээд өнөөдөр хаалтаа хийж байна. Төслийн хугацаанд нэлээд олон DVD-гээр видео хичээлүүдийг багш нар өөрсдөө боловсруулсан.

Өөрөөр хэлбэл, эндээс арга зүйн зөвлөмжийг нь өгч чиглүүлээд, багш нар өөрсдөө хичээлээ боловсруулсан. Харин багш нарын боловсруулсан хэрэглэгдэхүүнүүдийг ерөнхий боловсролын сургуулиудад нийтийн хүртээл болгож түгээсэн. Яг орчинд нь ажиллаж байгаа багш нар өөрсдөө боловсруулж байгаа учир бусад багш нарт суралцахад маш дөхөмтэй байснаараа онцгой ач холбогдолтой байлаа. Нөгөө талаасаа төслийн хүрээнд видео бичлэг хийх, тоног төхөөрөмж ашиглах зэргийг сургалтын хөтөлбөртөө ашиглах боломжтой болсон. Энэ мэт олон төсөл МУБИС дээр хэрэгжиж байгаа. Үүний нэг нь энэхүү “Хөдөөгийн бага боловсролын чанарыг ахиулахад мэдээллийн харилцааны технологийг оновчтой ашиглах нь” төсөл юм. Цаашид манай сургууль Азийн хөгжлийн банк болон Дэлхийн банктай хамтарсан төсөл хэрэгжиж байгаа” гэлээ.

Н.Жадамба: Юмэ Ямагучид Монголын мянга мянган багш нарын өмнөөс гүн талархал илэрхийлж байна

Төслийн хүрээнд хийсэн ажлын тухайд МУБИС-ийн төслийн багийн ахлагч, гавьяат багш, профессор Н.Жадамба “МУБИС-ийн багш нар 2012 онд мэргэжлийн багийн сургалт зохион байгуулж, сургалтын цахим хэрэглээний асуулга боловсруулж, сургалтын DVD хийж ашиглах талаар хэлэлцсэн. Улмаар цахим хэрэглэгдэхүүн боловсруулахад чиглэл болох гарын авлагыг “Сургалт-семинарын зөвлөмж” нэрээр бэлтгэн нийтийн хүртээл болгосон. 2012 оны есдүгээр сард бага боловсролын төвшинд сургалтын цахим хэрэглэгдэхүүн боловсруулах асуудлаар аймаг, орон нутгийн 90 гаруй оролцогч бүхий улсын хэмжээний сургалт–семинарыг Улаанбаатар хотноо зохион байгууллаа. Энэхүү сургалт –семинарын үеэр сургалтын цахим хэрэглэгдэхүүний зохиомж боловсруулах уралдааныг улсын хэмжээнд зарлаж, сургууль, багш нарт “Сургалт-семинарын зөвлөмж” номоо түгээсэн.

Энэхүү номд сургалтын цахим хэрэглэгдэхүүн хийх ажлын үе шатлал, тухайлбал тухайн сэдвийн агуулгаа сонгож, түүнээ бусдад хүргэх зохиомжоо боловсруулж, үүнийхээ дагуу зураг авах нарийвчилсан төлөвлөгөө хийж, авсан зургаа эвлүүлэн монтажлах зэрэг алхмуудыг тайлбарлан оруулсан билээ. Уг номын агуулгаар аймаг бүр бага ангийн багш нарт сургалт–семинар зохион байгуулж, зохиомжийн уралдааныг гурван үе шатаар явуулж, эцсийн шалгаруулалтыг 2013 оны тавдугаар сард бүсчилж шалгаруулахад бүсээсээ Ховд, Баянхонгор, Булган, Хэнтий аймгууд, нийслэлээс Сонгинохайрхан дүүрэг тус тус шалгарсан.  Улмаар шалгарсан аймгийн Боловсрол, соёлын газрыг сургалтын цахим хэрэглэгдэхүүн хийхэд зайлшгүй шаардагдах видео камер, гэрэл, дэлгэц, компьютер, проектор, программ хангамж зэрэг хэрэглэгдэхүүнээр хангасан.

Мөн төслийн хүрээнд МУБИС-ийг сургалтын цахим хэрэглэгдэхүүн боловсруулах видео студи байгуулахад шаардагдах тоног төхөөрөмжөөр ханган улмаар мэргэжлийн мултимедиа студи байгуулагдсан. Түүнчлэн зохиомжийн уралдаанд шалгарсан аймаг (дүүрэг) бүрт төсөл хэрэгжүүлэх орон нутгийн баг нийт 180 багшийн бүрэлдэхүүнтэй байгуулагдан ажилласан. Төслийн явцын байдалтай танилцаж, орон нутгийн багш нарт мэргэжлийн зөвлөгөөгөөр хангах, хамтран ажиллах зорилго бүхий сургалт–семинарыг МУБИС-ийн мэргэжлийн багийн оролцоотой хэд хэдэн удаа амжилттай зохион байгууллаа.

Тухайлбал, орон нутгийн төслийн багийн зохицуулагч (Боловсрол, соёлын газрын бага боловсролын мэргэжилтэн) зарим багшийн бүрэлдэхүүн бүхий багийг Япон улсад явуулж, Японы багш нартай харилцан туршлага солилцож, хамтран ажиллуулсан. Орон нутгийн багш нар маш идэвх чармайлт гарган ажилласнаар, тэдний шууд оролцоотойгоор бага ангийн найман хичээлээр нийт 30 цахим хичээлийг DVD хэлбэрээр боловсруулж, “Бага ангийн багшийн гарын авлага-2015” ном тус тус нийтийн хүртээл болсон юм.

Эдгээр бүтээгдэхүүнийг эцэслэн боловсруулахад МУБИС-ийн мэргэжлийн багш нар тухай тухайн үед нь байнга туслан зөвлөж байсныг тэмдэглэх нь зүйтэй байх. Төсөлд идэвхитэй оролцсон багш нар өөрсдийн туршлага, бүтээлээ цахим хэлбэрээр, мөн “Бага ангийн багшийн гарын авлага-2015” номд багтаан нийтийн хүртээл болгосноороо ихээхэн хөгжиж, сурангаа хийдэг, хийнгээ сурдаг гэсэн мэргэдийн сургаалийг аргагүй сануулсаныг энд онцлон тэмдэглэх байна.  Энэхүү төслийг санаачлан боловсруулж, санхүүжилтийн асуудлыг шийдвэрлэх, төсөл амжилттай хэрэгжиж, төлөвлөснөө бүрэн хэрэгжүүлэхэд маш их идэвхи чармайлт гарган ажилласан Токиогийн Технологийн Сургуулийн профессор Юмэ Ямагучид Монголын мянга мянган багш нарын өмнөөс гүн талархал илэрхийлмээр байна. 

Төслийн хаалтын үеэр Ховд айгийн боловсролын газрын мэргэжилтэн И.Бат-Эрдэнэ “Хөдөөгийн бага боловсролын чанарыг ахиулахад мэдээллийн харилцааны технологийг оновчтой ашиглах нь” төсөл 2012-2017 оны хооронд хэрэгжиж байна. Анх хэрэгжиж байхдаа бүх аймгуудад сургалтын цахим хэрэглэгдэхүүн бэлтгэх талаар уралдаан зарлаж байсан. Уралдаанаас шалгарсан аймаг, дүүргүүдэд манай Ховд аймаг шалгарч чадсан. Улмаар нийтдээ зургаан хичээлийн 36 DVD-ийг боловсруулсан. Энэхүү төсөлд хамрагдахдаа манай баг математик, Монголхэл, Хүн байгаль, Хүн нийгэм, Харилцаа, дүрслэх урлаг зэрэг зургаан хичээлийн цахим хэрэглэгдэхүүнийг боловсрууллаа. Мэдээж төсөлд хамрагдах хугацаанд манай багш нарын сүүлийн үеийн мэдээлэл харилцааны технилогийг ашиглах чадвар эрс сайжирсан” гэдгийг дуулгаж байлаа.