БНСУ-ын анхны эмэгтэй Ерөнхийлөгч Пак Гын Хе авлига, албан тушаалаа урвуулан ашигласан зэрэг хэрэгт буруутгагдан суудлаасаа буусан. Улмаар түүний залгамжлагчийг сонгох ээлжит бус Ерөнхийлөгчийн сонгууль өнөөдөр болно. 

Сонгуульд нийтдээ 11 улстөрч нэр дэвшиж байгаа. Гэхдээ урьдчилсан санал асуулгуудад Ардчилсан намаас нэр дэвшигч Мүн Жэ Ин, Ардын намаас нэр дэвшигч Ан Чёл Су нар хамгийн олон санал авснаар гол өрсөлдөөн тэдний дунд болно гэсэн хүлээлт байгаа юм.

Сонгуулийн санал хураалт өнөөдөр 06:00 цагт орон даяар эхэлж, 20:00 цагт хаагдана. Нийтдээ 3507 санал авах байр ажиллаж буй бөгөөд 42.4 сая сонгогч ирэх таван жилд тус улсыг тэргүүлэх эрхмийг сонгох билээ. Түүнчлэн, Сонгуулийн Ерөнхий хорооноос мэдээлснээр санал хураалтын дүн маргааш өглөө үүрээр 03:00 цаг гэхэд албан ёсоор гарна гэх мэдээллийг хэвлэлийнхэнд өгчээ.  Ажиглагчид, судлаачдын хэлж буйгаар энэ удаагийн сонгууль түүхэндээ хамгийн их ирцтэйд тооцогдож магадгүй хэмээн таамаглаж байна.

Ялах магадлал хамгийн өндөртэй гэгдэг буй Ардчилсан намын нэр дэвшигч Мүн Жэ Ин өнөөдөр төрөлх Бусан хотдоо очиж, хуулиар олгогдсон сонгох эрхээ эдлэх гэнэ.  Хамгийн сүүлд явуулсан санал асуулгын дүнгээр тэрбээр бусад нэр дэвшигчдээ хол зөрүүтэй тэргүүлсэн юм. Тодруулбал, энэ сарын эхний долоо хоногт явуулсан санал асуулгад Мүнийг 40 хувь нь дэмжсэн бол Ан Чёл Суг дэмжигчдийн тоо 20 хувтай байжээ.