Байгалийн давагдашгүй хүчин зүйлийн өмнө хүн төрөлхтөн хүчин мөхөсдсөөр ирсэн. Тиймээс  учирч болзошгүй аюулыг улс орон дан ганцаар туулах  бус бүс нутгаараа нэгдэн нийлж давж гарах талаар тив тивээрээ   хэлэлцэн ухаанаа уралдуулах  болсон.  Өмнөговь аймагт өнөөдөр ч зохион байгуулагдаж буй  “Говийн чоно-2017” олон улсын хамтарсан сургуулилтын үеэр ч мөн л энэ асуудал хөндөгдөж байлаа. Монгол Улс энэ талаар анхаарч нутаг дэвсгэрээ бүсчлэн хуваасан байна. Гэсэн хэдий ч бидэнд анхаарлын гадна үлдээж болохгүй зүйл бол гамшиг нүүрлэсэн үед  иргэдээ нүүн шилжүүлэх нөөц бүхий талбайг бий болгох асуудал.  Дашрамд өгүүлэхэд, манай улс  өмнө иргэний хамгаалалтын зориулалтын ашиглах зориулалт бүхий талбайтай байсан байна.

Тодруулбал, Яармагийн дэнжийн өмнөх талбайг  дээрх зориулалтаар улсын нөөцөд авсан байсныг  нь эрх мэдэл бүхий албан тушаалтнууд  баячуудад өндөр  үнээр худалдсаны улмаас  эдүгээ морин тойруулга, олон улсын дунд сургууль,  орон сууцны өндөр үнэ бүхий хороолол болж хувирсан. 

Монгол Улсад газар хөдлөхгүй гэсэн баталгаа байхгүй. Азаар манайд  газар хөдлөлт чичиргээ төдийхнөөр  мэдэгдээд өнгөрөх юм даа. Япон шиг өглөө оройгүй чичиргээ мэдэгдэж, тэнгэрт тулж очсон өндөр барилгууд нь савж байдаг бол  яана.  Тийм зүйл болбол шил даран сүндэрлэсэн орон сууцны хороолол, офиссын барилгууд нь нуран Дэнжийн мянга, Долоон буудал, Улиастай хавийн   гэр хороолол л шовойгоод үлдэж мэдэхээр.

Ер нь  сүүлийн  жилүүдэд баригдсан барилгууд долоогоос дээш баллын  газар хөдлөлтийг тэсвэрлэж гарна гэдэг юу л бол.  Ийм учраас  Монгол Улсад   байгалийн гамшиг болсон үед иргэдээ нүүлгэн шилжүүлэх нөөцийн газар байна уу гэж асуугаад байгаа хэрэг.  Өнөөдөр Улаанбаатарт нөөцийн талбай бүү хэл, машин тавих зогсоол ч олддоггүй.   Аюул тохиолдвол хаана хоргодох эсэхээ иргэд маань мэддэггүй байж мэднэ. Сургууль, цэцэрлэгийн барилгуудад хоргодох байр байдаг гэж дуулдаагүй. 

Өнөөдрийн байдлаар Монгол Улсад стандартын шаардлага хангахуйц цорын ганц талбайтай газар бол Өмнөговь аймаг.  Эл нөөцийн талбайгаа баталгаажуулах  арга хэмжээг авна гэдгээ ч тус аймгийн Засаг дарга Н.Наранбаатар   олон улсын хамтарсан дадлага ,сургуулилтийн  үеэр онцолж байсан.   Чухам ийм учраас  ОБЕГ нийслэлийн удирдлагуудад  аюул тулгарсан үед ашиглах нөөцийн талбайг  төрөөс,  Улаанбаатар хотын ЗДТГ-аас шаардаад байгаа юм билээ.   Албаны хүний өгсөн тайлбараар, нөөцийн газрыг Багахангай дүүрэгт санал болгоод байгаа аж. 

Аюул хэлж бус хийсч ирдэг.  Улаанбаатар хотод  өнөөдөр   сая илүү хүн ажиллаж амьдарч байна.  Газар хөдлөлтийн чичиргээ хүчтэй мэдрэгдэх үед бидэнд Багахангай руу нүүлгэн шилжүүлэлт хийх цаг хугацаа, эдийн засгийн чадавхи  бийсэн билүү.  Дээр нь Налайх  чиглэлийн зам нарийхан. Дөрөв, тав, зургаан эгнээгээр ашиглах зам байхгүй. Газар нь ч хавчиг.  

АНУ-ын Нью Орлеан мужид  болсон газар хөдлөлтийн үеэр  тус улсын Онцгой байдлын алба шаардлагатай бүхий л арга хэмжээг авч  нүүлгэн шилжүүлэх ажиллагааны рекордыг тогтоосон хэдий ч  арав гаруй хүний амь нас эрсэдсэн байдаг.  Энэ нь нүүлгэн шилжүүлэх цуваан дунд явсан автобусны шатахуун дууссаны улмаас уг автобусанд сууж явсан өндөр настан, хэвтрийн иргэд амиа алдсан аж.  Энэ жишээ бол өндөр хөгжилтэй, ухамсар өндөр оронд тохиолдсон эмгэнэлтэй явдал.  Монголчуудын  тухайд хүнд хэцүү цаг үед  бусдад хүндэтгэлтэй хандах ухаан биднээс гарах эсэх нь  эргэлзээтэй.  Мөнгө төгрөгтэй, хурд хүчтэй машин унадаг нөхдүүд ядуу иргэдийнхээ урдуур дайрч, байдал  хүндэрвэл дээгүүр нь гишгээд гарч байж ч мэднэ.  Тийм учраас л аюул болсон үед толгойгоо барин үсээ зулгаах бус урьдчилан сэргийлэх арга хэмжээг авах явдал шүү дээ.