Соёлын асар том өв хадгалагдаж буй музейгээс 100 кг жин татахуйц цэвэр алтан зоос хулгайлагдсан хэрэг Германд гарчээ. Тодруулбал, тус улсын нийслэл Берлин хотын төв хэсэгт байрладаг Боде музейд энэ сарын 27-ны өглөө үүрээр хулгайн гэмт хэрэг гарч, 3.7 сая еврогийн үнэ хүрэхүйц алтан зоосыг үл таних этгээд хулгайлжээ.

Алтан зоос 100 кг жинтэй бөгөөд диаметр нь 53 см, өргөн нь гурван см гэнэ. Уг зоосыг 2007 онд Канадад үйлдвэрлэжээ. Зоосны нэг талд Их Британийн хатан хаан Элизабетын хөрөг сийлээстэй байгаа аж.

Албаныхан гэмт хэрэгтнийг ганцаараа биш байсан хэмээн үзэж байна. Тэрбээр шат ашиглан музейн цонхоор нэвтэрсэн байжээ.