ОХУ-ын нийслэл Москвад өнөөгийн Засгийн газрын авлига хээл хахуулийг эсэргүүцсэн өргөн хүрээтэй жагсаалд оролцоод 1000 орчим хүний хамт баривчлагдсан сөрөг хүчний удирдагч Алексей Навальныйг 15 хоногийн турш саатуулахаар болжээ.

Москвагийн дүүргийн шүүх цагдаагийн машинаар хүргэгдсэн ирсэн А.Навальныйд холбогдох хэргийг хэлэлцээд дээрх шийтгэлийг ногдуулжээ. 2018 оны сонгуульд сөрөг хүчнээс нэр дэвшихээ мэдэгдсэн А.Навальный энэ сард Ерөнхий сайд Дмитрий Медведев нууц ашгийн бус байгууллагын сүлжээ ашиглан Үл хөдлөх хөрөнгийн вант улс байгуулсан тухай бичлэг хийж цацаж, улмаар эсэргүүцлийн жагсаалд оролцохыг уриалж байсан юм.

Улмаар өнгөрөгч амралтын өдөр ОХУ-ын хэд хэдэн томоохон хотод эсэргүүцлийн жагсаал болж, 1000 орчим хүн баривчлагдсаны нэг нь А.Навальный байсан билээ. Цагдаагийн газраас мэдээлснээр зөвхөн Москвад болсон жагсаалд 7000-8000 хүн оролцжээ.