Кувэйтийн сүлжээ Үндэсний кино театрт компани тус улсад өнгөрсөн долоо хоногт нээлтээ хийсэн Диснейн бүтээл “Гоо үзэсгэлэн ба араатан” киног хоригложээ. Тэд нийгмийн хариуцлагын хүрээнд энэ алхмыг хийж байна гэж тайлбарласан байна.

Диснейн хүүхэлдэйн киног дэлгэцнээ амилуулсан тус уран бүтээлийн гол дүрд “Харри Поттер” киноны од Эмма Уатсон тоглосон билээ. Харин муу дүрийн гол баатар болох Гастоны найз Ле Фоуг тус кинонд гэй болгож дүрсэлсэн нь Диснейн түүхэн дэх анхны тохиолдол болсон юм. Гэвч бэлгийн цөөнхийг дүрсэлсэн шалтгаанаар олон орон уг киног насанд хүрээгүй хүүхдүүдэд үзүүлэхгүй байх шийдвэрийг гаргаад байна.

Өмнө нь “Гоо үзэсгэлэн ба араатан” киног ОХУ 16-аас доош насныхан үзэхийг хориглосон бол Малайз ч гэсэн хориглох шийдвэр гаргасан удаатай. Малайзын тал Диснейгээс ижил хүйстэнтэй хэсгийг хасахыг шаардсан ч, кино компани боломжгүй гэх хариу өгсөн байдаг. Харин эдүгээ тус улс байр сууриа өөрчилж, кино энэ сарын 30-нд нээлтээ хийхээр болсон гэнэ. Гэхдээ зөвхөн 13-аас дээш насныхан л үзэх эрхтэй болж байгаа аж.