Умард Солонгосын удирдагч Ким Жон Уны эцэг нэгт ах Ким Жон Нам Малайзын Куала Лампур хотын нисэх онгоцны буудалд бусдад хорлогдож нас барсантай холбоотойгоор тус хоёр улсын харилцаа хурцдаж эхэлсэн. Тэгвэл Малайзын эрх баригчид тус улсад суух Хойд Солонгосын Элчин сайд Кан Чолыг улсаасаа албадан гаргах шийдвэр гаргаж, 48 цагийн дотор тус улсыг орхихыг шаардсан тухай эх сурвалжууд мэдээлж эхэллээ.

 

Малайзын Гадаад хэргийн яам энэ сарын 4-нд Умард Солонгосын Элчин сайдыг эх орноосоо албадан гаргах арга хэмжээ авснаа зарласан. Тус мэдэгдэлд “БНАСАУ-ын Элчин сайдыг улсаасаа албадан гаргах болсон нь хууль бус үйл ажиллагаандаа Малайзыг ашигласантай холбоотой” хэмээгээд “Малайзын хүн амины хэргийг мөрдөн шалгах ажиллагааг шүүмжилснийхээ төлөө уучлалт гуйхгүй байгаа нь Хойд Солонгосын Элчин сайд уучлалт гуйх бодолгүй байгааг илтгэж байна. Тиймээс 48 цагийн дотор манай улсаас гарахыг хүсье” гэжээ.

 

Үүсээд буй зөрчил өнгөрсөн сарын 13-ны өдрөөс эхтэй. Мөн өдөр Куала Лампурын олон улсын нисэх онгоцны буудалд Макао руу нисэхээр явж байсан Ким Жон Намыг Вьетнам, Индонезийн иргэншилтэй хоёр эмэгтэй VX гэх үхлийн хороор хордуулж, амийг нь бүрэлгэсэн байдаг. Улмаар энэ хэргээс үүдэн Малайз, Умард Солонгосын дипломат харилцаанд сэв сууж эхэлсэн юм. Пхеньяны талаас Ким Жон Намын цогцост ДНК-ийн шинжилгээ хийхийг эсэргүүцсэний зэрэгцээ Малайз хэргийг мөрдөн шалгаж буйг эсэргүүцэн, тус улсын Засгийн газрын Хойд Солонгосын дайснуудтай хуйвалдсан хэмээн буруутгасан. Харин тус улстай дайсагнасан харилцаатай байгаа Өмнөд Солонгос Ким Жон Намын үхэлд Умард Солонгосыг буруутгаж, хэргийг захиалагч нь  эцэг нэгт дүү Ким Жон Ун байх магадлалтайг онцолж байгаа.

 

 Ким Жон Нам амиа алдсны дараа Хойд Солонгос түүний цогцсыг эх орон руу нь шилжүүлэхийг шаардсан ч, Малайз үл зөвшөөрсөн юм. Гэтэл үүний хариуд тус улсын Элчин сайд Кан Чол Малайзын хэргийг мөрдөн шалгах ажиллагааг улстөржүүлж байна хэмээгээд, дайсны талтай хуйвалдагсад хэмээн хатуухан мэдэгдсэн байдаг.  Түүний үгэнд эгдүүцсэн Малайзын Ерөнхий сайд Нажиб Разак Элчин сайд Кан Чолын хэлсэн үг “утгагүй” хэмээгээд “дипломат ёсонд нийцэхгүй” гэж шүүмжилсэн удаатай.  

 

Ингээд Малайз тус улсаас Хойд Солонгост суух Элчин сайдаа эгүүлэн татаж, визгүй зорчих тогтолцоог халснаар хоёр улсын харилцаа хүйтэрч эхэлсэн билээ. Харин энэ удаа Хойд Солонгосын Элчин сайдыг  хөөж эхэлсэн бололтой. 

 

Ямартай ч, Малайзын Гадаад хэргийн яамнаас мэдэгдэл гаргаж, 24 цагийн дотор тус улсыг орхихыг шаардсаны дараа буюу өчигдөр Элчин сайд Кан Чол эх орон руугаа буцжээ. Тиймээс цаашдаа ч, тус хоёр улсын харилцаа муудаж, дипломат харилцаагаа тасалж ч болзошгүй байгааг зарим ажиглагчид онцолж байна.