“Нийтээр тэмдэглэх баярын болон тэмдэглэлт өдрүүдийн тухай” хууль, Монгол Улсын Ерөнхийлөгчийн 2012 оны 158 дугаар зарлигийн дагуу уламжлал болгон зохион байгуулдаг “Үндэсний бичиг соёл, номын өдрүүд”-ийг есдүгээр сарын 18-20-ны өдрүүдэд улс орон даяар тэмдэглэн өнгөрүүлж байна. Энэхүү 40 дэх удаагийн "Номын баяр"-ын нээлтийн ёслол өнөөдөр Сүхбаатарын талбайд болж, нийслэлийн Засаг дарга бөгөөд Улаанбаатар хотын Захирагч Б.Пүрэвдагва оролцлоо. 

Нийслэлийн Засаг дарга бөгөөд Улаанбаатар хотын Захирагч Б.Пүрэвдагва “Номын баяр нь зөвхөн ном бүтээх, хэвлэн нийтлэх, худалдаалах, сурталчлах үйл ажиллагаа төдий бус, ном унших соёл, мэдлэг боловсролыг эрхэмлэх үзэл, эх хэл, үндэсний бичиг, соёлоо дээдлэн өвлүүлэх чухал үйл явдал юм. Энэ жилийн номын баяр Монгол Улсын Ерөнхийлөгчийн ивээл дор зохион байгуулагдаж, Монгол Улсын Хөдөлмөрийн баатар, Төрийн шагналт, Соёлын гавьяат зүтгэлтэн, төр, нийгэм, утга зохиол, урлаг соёлын алдар цуутан, эрдэмтэн мэргэдээс гадна Энэтхэг, Солонгос, Хятад, Япон, Киргиз зэрэг 10 гаруй орны 30 гаруй зохиолч, нийтлэгч, уран бүтээлч оролцож байна. Иргэд, олон нийт, хүүхэд багачууд бүгдээрээ жилд хоёр удаа болдог "Номын баяр"-ыг хүлээдэг болжээ. Ном уншдаг иргэн олшрох тусам оюунлаг хотын хөгжил улам бүр батжин бэхжинэ” хэмээн тодотгов.

Монгол өв соёл, түүхээ дэлхий дахинд таниулж, утга зохиол, урлаг соёл, хотын хөгжилд үнэтэй хувь нэмэр оруулж буй зохиолч, ном бүтээгчдийг дэмжин урамшуулж, “Улаанбаатар грант” шагналыг гардууллаа. “Улаанбаатар грант” шагналыг судлаач Ж.Соёмбо, Ж.Төртүвшин нарын хамтын бүтээл “Чингис хааны тагнуулын нууц товчоо” бүтээлд гардуулан өглөө.

Үндэсний номын баярын дээд шагнал “Мэргэн ном” цомыг Соёлын гавьяат зүтгэлтэн, зохиолч Г.Аюурзана  “Шүгдэн” роман, "Оюунлаг эргэлт медиа групп"-ийн Ergelt.mn сайтын сэтгүүлчдийн хамтын бүтээл “Сүүлчийн нүүдэлчид” номоороо хүртлээ. 

Нийслэлийн Засаг даргын Тамгын газар, “Номын соёлт ертөнц” ТББ-тай хамтран 20 дахь жилдээ "Номын баяр"-ыг зохион байгуулж байгаа юм. Номын баяраар гурван өдрийн турш зохиолчдын хэсэг, гадаад оролцогчдын гудамж, хэвлэлийн газруудын тусгай гудамж, залуу хэвлэн нийтлэгчдийн “Indie Street”, Зурагт номын гудамж зэрэг хэсэг ажиллаж, зохиолч, уншигчдын уулзалт, шинэ номын нээлт, гарын үсэгтэй худалдаа, хүүхдийн номын уншлага, шатрын тэмцээн, урлагийн тоглолт зэрэг олон талт үйл ажиллагааг зохион байгуулж байна.