Орос улс өнөөдөр Аугаа их Эх орны ялалтын баярын өдрийг тэмдэглэнэ. Одоогоос 72 жилийн тэртээх 1945 оны тавдугаар сарын 9-ний энэ өдөр Дэлхийн II дайныг өдөөгч Гитлерийн Герман Берлин хотод үг дуугүй бууж өгөх гэрээнд гарын үсэг зурснаар энэ өдрийг албан ёсоор Зөвлөлтийн ард түмний ялалтын баяр болгон тэмдэглэх болсон юм. Энэ өдөр бол ганц зөвлөлт ч гэлтгүй Дэлхийн II дайнд зовж, зүдэрсэн бүхий л ард түмний ялалтын баяр билээ.

Дэлхийн II дайны хөлд нийт  60 гаруй улс их бага хэмжээгээр нэрвэгдэж, түүнд 70-аад сая хүний алтан амь үрэгдсэн байдаг. Эх орны дайнд тэр үеийн ЗХУ хамгийн их хохирол амсаж, 27 сая хүний алтан амь үрэгдэж, том жижиг 1710 хот, 70 мянга гаруй тосгон суурин бүрэн болон хагас нуранги болж, 32 мянга орчим үйлдвэр аж ахуйн газар, 98 мянган сангийн аж ахуй, 1876 хамтрал  шатаж, нурж сүйдсэн гэдэг тоо бий.

Хүн төрөлхтөний түүхэн дэх хамгийн их хохирол дагуулсан энэ дайнд амь үрэгдсэн гурван хүн тутмын хоёр нь эгэл жирийн ард иргэд, хүүхэд, хөгшид, эмэгтэйчүүд байсан гэдэг. Түүхэн тэмдэглэлт энэ өдрийг манай хөрш Орос орон даяар сүр жавхлантай тэмдэглэн өнгөрүүлдэг бөгөөд өнөөдөр Москва хотын Улаан талбайд ёслолын сүрт жагсаал эхэлнэ.  Энэ удаагийн жагсаалд нийтдээ 10 мянган цэрэг, 114 хуягт техник Улаан талбайг дамжин өнгөрөх бол тэнгэрт  хэдэн арван нислэг тэрэг, байлдааны онгоцнууд зөрөлдөн нисэх гэнэ.