Онцгой байдлын ерөнхий газраас сураггүй болсон хоёр иргэнийг эрэн хайх ажиллагааг үргэлжлүүлж байгаа ажээ.

Тодруулбал, Өвөрхангай аймгийн Тарагт сумын Арвайн тал багийн “Усчны хоолой” гэдэг газар иргэн Д өнгөрсөн сарын 22-ны өдрийн 16:00 цагт малдаа яваад сураггүй болсон дуудлага Онцгой байдлын газарт ирсэн байна.

Алга болсон иргэнийг эрэн хайх ажиллагаанд орон нутгийн 19 иргэн, нийт 46 хүн, Арвайн тал багийн “Хараацай хайрхан” уулын өврөөс 63 км газрыг явганаар болон автомашинаар хайсан ч олоогүй байна.

Мөн Хөвсгөл аймгийн Тариалан сумын Давааны-Ар багийн “Буянт гол” гэдэг газар /сумын төвөөс хойд зүгт 60 км/ иргэн Б энэ сарын 2-нд малдаа яваад сураггүй болсон аж. Түүнийг Онцгой байдлын газрын долоон албан хаагч, Булган аймгийн Тэшиг сумаас 14 хүн, нийт 21 хүн, дөрвөн техник хэрэгсэлтэйгээр Дулаан хаан уул, Тастын ой уул, Зорлигийн гол, Буянт голын бургас зэрэг газруудад эрэн хайх ажиллагааг зохион байгуулж байгаа юм байна.