Их Британид Европын холбооноос гарах эсэх талаарх бүх нийтийн санал асуулга өнгөрсөн сард болсон. Санал асуулгын дүнд британичуудын ихэнх нь гарах сонголтыг хийсэн билээ.  Тэгвэл гарах сонголт хийхийг иргэддээ уриалж байсан Европарламентын гишүүн 52 настай Нигель Фараж өчигдөр Тусгаар тогтнолын намын даргаасаа огцорч буйгаа зарлалаа.

Лондон хотноо зарласан хэвлэлийн бага хурлын үеэр тэрбээр “Тусгаар тогтнолын намын даргын суудлаасаа огцорч байна. Бүх нийтийн санал асуулгад иргэд гарах сонголтыг хийсэн нь миний улстөрийн нэр нөлөө хэрхэн өссөнийг харуулж байна” гэж ярьжээ.

 Мөн Нигель Ерөнхий сайд Дэвид Камероныг хэн ч залгамжилсан бай ЕХ-ноос гарах хөдөлгөөнийг олон жилийн турш тэргүүлсэн хүн байх ёстой хэмээн онцолсон байна.  Нигель Фараж эдүгээг хүртэл хоёр удаа Тусгаар тогтнолын намын даргын суудлаасаа огцорч буй нь энэ аж. Эхний удаа 2009 онд тэрбээр огцорч байсан бол 2015 онд тус намыг дахин толгойлох болжээ.