АНУ-ын Флорида мужид АНУ-ын Ерөнхийлөгч Доналд Трампын хувийн хэрэглээндээ ашиглаж байсан час улаан өнгийн тансаг зэрэглэлийн Феррари 430 машиныг үнэ хаялцуулан худалдаалж, 270 мянган ам.долларын үнэ хүрчээ.

Энэ удаагийн дуудлага худалдааг “Auctions America” компани явуулсан байна. Чухам хэн гэгч тус машиныг худалдан авсныг зохион байгуулагчид нууцалж байна.

“Auctions America” компанийн төлөөлөгч Ами Кристигийн хэлж буйгаар тус Ферраритай яг ижил загварын машин хамгийн ихдээ 125-175 мянган ам.долларын л үнэ хүрдэг гэнэ.

 Доналд Трампын час улаан машиныг харахаар түүнийг дэмжигчид, машин сонирхогчид урт дараалал үүсгэн цугларсан байжээ.

Машины явсан зай ойролцоогоор 9660 км. Трамп өөрөө унаж байхдаа 3860 км зам туулсан бөгөөд 2011 онд заржээ. Тэр үед нь уг машиныг худалдаж авсан эрхэм энэ удаа машинаа зарсан байна. Гэхдээ нэрээ мөн л нууцлахыг хүсчээ.