Жүдо бөхийн 2025 оны Абу-Дабигийн Их дуулга тэмцээний эхний өдөр эрэгтэйчүүдийн -60 кг жинд хүч үзсэн ОУХМ Э.Ариунболд мөнгөн медаль хүртлээ.

Тэрбээр С хэсэгт орж эхний тойрогт ОХУ-ын бөх Харун Тлишевтэй барилдаж юко болон вазари үнэлгээгээр ялалт байгуулсан бол хоёрдугаар тойрогт Италийн бөх Андрэй Карлино юко үнэлгээгээр, хэсгийн аваргын төлөө Туркийн бөх Салих Йылдыз цэвэр ялж хэсгийг тэргүүллээ. Улмаар медалийн төлөөх барилдаанд Гүржийн бөх Георги Сардалашвилиг цэвэр ялж, алтан медалийн төлөө ОХУ-ын бөх Аюб Блиевд вазари үнэлгээгээр ялдаж мөнгөн медаль хүртлээ.

Тус тэмцээнд Монгол Улсаас 15 тамирчин зодоглож байгаа бөгөөд өчигдөр найман бөх барилдаж ОУХМ Э.Ариунболд мөнгөн медаль хүртсэн бол өнөөдөр гурван бөх барилдана.