Испанийн Ла лигийн 7 дугаар тойргийн үлдсэн тоглолтууд өнгөрсөн шөнө боллоо. Энэ тойрогт “Атлетико Мадрид” клуб “Валенсия”-гийн талбайд зочилж, 0:2-оор буулгаж авснаар 15 оноотой болж, хүснэгтийг тэргүүлж эхэллээ. “Атлетико” 7 тойрогт 4 хожиж, 3 тэнцсэн бөгөөд хожигдоогүй яваа юм. Энэ удаагийн тоглолтын 63 дахь минутад Гризманн гоолдож, тооны харьцааг нээсэн. Ингэснээр 6 гоолтой болж, мэргэн буучийг ганцаар тэргүүлж байна. Тэгвэл хожлын гоолыг 90 дэх минутад Гамейро оруулжээ.

Харин энэ тойрогт хүснэгтийг тэргүүлж байсан “Реал Мадрид” клуб талбайдаа “Эйбар”-ыг хүлээж авч, 1:1-ээр тэнцлээ. Эхний дөрвөн тойрогт дараалан хожоод байсан Эзэн хааны баг ийн гурав дараалж тэнцлээ. Ингэснээр 15 оноотой болж, гоолын зөрүүгээр хоёрдугаар байрт бичигдэж байгаа юм. Тоглолтын 6 дахь минутад зочин багаас Рико тооны харьцааг нээсэн. Харин 17 дахь минутад Бейл тэнцүүлжээ.

Мөн энэ тойрогт “Барселона” клуб “Сельта”-гийн талбайд зочилж, 4:3-аар хожигдлоо. Ингэснээр 13 оноотой хэвээр үлдэж, 4 дүгээр байрт бичигдэж байна.  Тоглолтын 22 дахь минутад Систо тооны харьцааг нээсэн бол Аспес 31 дэх минутад нэгийг нэмжээ. Тэгвэл 33 дахь минутад “Барса”-гаас Матье өөрийнхөө хаалганд авто гоол оруулсан бол Эрнандес 77 дахь минутад гүйцээжээ. “Барса”-гаас 58, 87 дахь минутад Пике хоёрыг оруулсан бол Неймар 64 дэх минутад торгуулын цохилтоос нэгийг оруулсан байна.