Залуучуудын Азийн АШТ-ий сүүлийн өдөр буюу өнөөдөр чөлөөт бөхийн эрэгтэйчүүдийн 55, 60, 66, 74, 84, 96 кг-ын жингийн барилдаан болж байна.

66 кг-ын жинд 2017 оны Роман Дмитриевын нэрэмжит залуучуудын ОУТ-ий мөнгө, залуучуудын УАШТ-ий хүрэл медальт “Хасу-Мегастарс” клубийн тамирчин Э.Тэмүүлэн тэгшитгэлд Мьянмарын Лар Таун Лианыг 10:0-ээр, 1/4 шигшээ барилдаанд эзэн орны Юү Чен Лог 12:2-оор тус бүр оноогоор цэвэр ялсан ч хагас шигшээд Ираны Амирхоссейн Али Хоссейнид 6:13-гаар ялагдав. Ингэснээр Э.Тэмүүлэн хүрэл медалийн төлөө барилдана.

84 кг-д өсвөр үе, залуучуудын улсын аварга Орхон аймгийн “Ирээдүйн одод” дунд сургуулийн тамирчин М.Цогтгэрэл шөвгийн наймд Киргизстаны Динисламбек Таалайбек Уулуг цэвэр ялсан ч хагас шигшээд Энэтхэгийн Деепак Пунад цэвэр даруулсан. Ингэснээр тэрбээр БНСУ-ын Ли Чол Йонтой хүрэл медалийн төлөө барилдахаар боллоо.

Тэгвэл 55 кг-д Өсвөр үеийн Азийн АШТ-ий хүрэл, өсвөр үе, залуучуудын улсын аварга БТСДуС-ын тамирчин Б.Ариунболд, 96 кг-д Борис Будаевын нэрэмжит залуучуудын ОУТ-ий мөнгөн медальт, өсвөр үе, залуучуудын улсын аварга “Аварга” сургуулийн тамирчин Ч.Алтангэрэл нар дагах барилдаанаа хийж ялалт байгуулснаар хүрэл медалийн төлөөх барилдахаар боллоо. Б.Ариунболд БНХАУ-ын Зон Ванхаотой, Б.Чинбат Казахстаны Серик Бакитхановтой медальтай үлдэх эсэхээ шийднэ. Ингэснээр өнөөдөр барилдсан манай зургаан бөхийн дөрөв нь хүрлийн төлөө барилдахаар болсон юм. 60 кг-д Э.Үнэт-Эрдэнэ Иранд 0:10-аар, Киргизстаны бөхөд 2:6-аар дийлдэж, 74 кг-д өсвөр үеийн ДАШТ болон Азийн АШТ-ий мөнгөн медальт, З.Сумъябазар шөвгийн наймд Японы бөхөд 3:4-өөр ялагдснаар тэмцээнээ өндөрлөлөө. Медалийн төлөөх барилдаан монголын цагаар 18:00 цагт эхэлнэ.