Өмнөд Суданы нийслэл Жубагаас Вау хотыг чиглэн ниссэн зорчигч тээврийн онгоц зорилтот цэгтээ газардах үедээ осолдсоны улмаас 37 хүн гэмтжээ. Тус улсын Засгийн газар, иргэний нисэхийн байгууллагаас энэ талаар мэдээлсэн байна.

Тухайн үед онгоцонд нисэх багийн таван гишүүн, 40 зорчигч зорчиж явжээ.

Гэмтэж бэртсэн зорчигчдыг орон нутгийн эмнэлэгт хүргэсэн байна. Гэхдээ азаар ноцтой бэртэл авсан хүн байхгүй гэдгийг албаныхан онцолжээ. Осол гарах үед Ваугийн нисэх онгоцны буудалд байсан гэрчүүд шатаж буй онгоцноос зорчигчид гүйж гарч ирсэн тухай орон нутгийн хэвлэлд ярьжээ. Мөн цаг агаарын нөхцөл байдал таагүй байсан гэнэ.