Монголын үзэгчдийн үзэх дуртай нэвтрүүлгийн нэг бол ОХУ-ын “Битва Экстрасенсов буюу Зөн билгийн тулаан” шоу билээ. Тэгвэл NTV телевизийн хамт олон “Зөн билгийн тулаан-Монголд” шоу нэвтрүүлгийг орон даяар, албан ёсны эрхтэйгээр бэлтгэн хүргэхээр болсон гэнэ.

Тус шоуны зохиогчийн эрхийг Нидерландийн “Тв медиа партнерс” болон Норвегийн “Голланд & Нордикс фильм” компани эзэмшдэг бөгөөд АНУ, Австрали, Украин, Болгар, ОХУ гэх мэт дэлхийн 20-иод улсад албан ёсны форматаар үзэгчдэд хүрдэг аж. Дашрамд сонирхуулахад, NTV телевиз ОХУ-ын “Битва Экстрасенсов” шоуг анх байгуулагдсан цагаасаа эхлэн албан ёсны эрхтэйгээр орчуулан хүргэж байсан билээ.

Харин энэ удаад тус телевизийн хамт олон “Зөн билгийн тулаан” шоуг албан ёсны эрхтэйгээр Монголд зохиогдож байсан зарим нэвтрүүлгүүдээс хийц, агуулгын хувьд ялгаатай, чанарын өндөр төвшинд бэлтгэн хүргэхээр болжээ.