Гватемалын улсын асрамжийн газарт гал гарч, өсвөр насны 40 хүүхэд амьдаараа шатаж нас баржээ. Улмаар энэ хэрэгтэй холбогдуулан тус улсын Хөдөлмөр, нийгмийн хамгааллын сайд Карлос Родас хариуцлагаа хүлээн огцорчээ. Үүгээр зогсохгүй түүнийг болон өөр хоёр томоохон албан тушаалтныг хүн амины хэрэг, хүүхэд хүчирхийлсэн хэрэгт сэжиглэн баривчилсан байна.

Хөдөлмөр нийгмийн хамгааллын сайд Карлос Родас хариуцлагаа хүлээн огцрох хүсэлтийг энэ сарын 13-нд Ерөнхийлөгч Жимми Моралест гаргасан байдаг. Харин гал олон улсын эмэгтэйчүүдийн баярын өдөр нийслэл Гватемал хотын зах хэсэгт байрлах асрамжийн газарт гарчээ. Хохирогчид бүгд 14-17 насны насанд хүрээгүй хүүхдүүд байжээ. Одоогоор гал гарсан шалтгаан хараахан тодорхой болоогүй байна.