Ерөнхий сайд Ч.Сайханбилэг өчигдөр уулын баяжуулах “Эрдэнэт” үйлдвэр 100 хувь Монголын мэдэлд шилжсэн талаар сэтгүүлчдэд мэдээлсэн. Тэгвэл эл асуудалтай холбоотой мэдээлэл “газеты.ru” сайтад нийтлэгджээ.  “Эрдэнэт” үйлдвэр болон “Монголросцветмет” нэгдлийн 51 хувийг Монгол, 49 хувийг Оросын тал эзэмшиж байсан. Тэгвэл ОХУ-ын Засгийн газар өөрийн эзэмшил 49 хувийг худалдсан тухай Ростех компанийн хөрөнгө оруулалтын холдинг болох   “РТ-Развитие бизнеса” мэдэгдсэн тухай тус сайтад мэдээлжээ. 

Уг мэдээллийг хөрвүүлбэл, “ОХУ-ын Засгийн газар өөрийн эзэмшил 49 хувийг худалдсан тухай Ростех компанийн хөрөнгө оруулалтын холдинг болох   “РТ-Развитие бизнеса” мэдэгдлээ. Харин худалдан авагч тал нь Монгол ажээ. Монголын тал эхэндээ “Эрдэнэт” үйлдвэрийн 49 хувийг 0.7 тэрбум ам.доллараар үнэлж байсан ч, эцэстээ 0.5 тэрбум ам.доллараар худалдан авсан гэсэн мэдээлэл байгаа юм. 

Ростех бизнес хөгжлийн агентлаг “Энэ нь ОХУ, Монголын зах зээлийн нөхцөлд харилцан ашигтай гэрээ болсон. Хувьцааны 49 хувийг худалдах багцыг эд хөрөнгийн чанар, түүний хөгжлийн боломжийг харгалзан зах зээлийн хамгийн боломжийн үнэлгээгээр үнэлсэн. Гэрээний үнийн нөхцлийг олон улсын аудит үнэлгээний байгууллагууд, зөвлөхүүдийг оролцуулан тохирсон” хэмээв.

Зарим эх сурвалжуудын мэдээлж буйгаар Ростех бизнес хөгжлийн агентлаг компанийн эзэмшил хувьцаагаа дэлхийн зах зээлд худалдаалсан бол 150-200 сая ам.долларын үнэ хүрэх боломжтой байжээ.  “Ростех бизнес хөгжлийн агентлаг” худалдсан үнийн талаар олон нийтэд мэдээлээгүй ч, түүхэн дэх хамгийн том худалдаа болсон гэдгийг онцолж байгаа юм.  “Ростех” компани өмнө нь аж ахуйн нэгжийн зардлыг бууруулах үйлдвэрлэлийн үр ашгийг дээшлүүлэх, зардлыг оновчтой болгох, хямралын эсрэг хөтөлбөрт нийцүүлэн ажиллах, санхүүжилтийн хэрэгцээг хангах зорилгоор 2025 он хүртэлх хөгжлийн стратегийн цогц төлөвлөгөө хэрэгжүүлэхээ мэдэгдсэн юм.

Энэ төлөвлөгөөний хүрээнд хэд хэдэн төсөл хэрэгжүүлэхээр болсны нэг нь “Эрдэнэт” үйлдвэрийн 49 хувийн хувьцааг эргэлтэд оруулах байжээ. “Монголросцветмет” болон “Эрдэнэт” үйлдвэрийг хуучин Зөвлөлт холбоот улс болон Бүгд найрамдах Монгол Улс хооронд байгуулсан хэлэлцээрийн дагуу 1973 болон 1978 онд байгуулж байсан гэдэг. “Эрдэнэт” нь зэс молебдины баяжуулах Азийн хамгийн том үйлдвэрүүдийн нэг юм. Жилд 26 сая тонн хvдэр боловсруулж 530 орчим мянган тонн зэсийн баяжмал, 4.5 орчим мянган тонн молибдены баяжмал үйлдвэрлэдэг” гэсэн байна.