Нийслэл болон хөдөө, орон нутагт хүйтний эрч чангарсантай холбогдуулан сургууль, цэцэрлэгийн хүүхдүүдийн дунд томуу, томуу төст өвчлөл нэмэгдсэн билээ. Тэгвэл  Баянхонгор аймагт томуу, томуу төст өвчин ихэссэнтэй холбогдуулан сургууль, цэцэрлэгийн үйл ажиллагааг тодорхойгүй хугацаагаар хаасан байна. Тус аймгийн хэмжээнд томуу, томуу төст өвчин амбулаторийн нийт үзлэгийн 13.8 хувьтай байгаа ажээ.

Харин сумын хэмжээнд 17.0 хувьд хүрчээ. Энэ нь дэглэлт хэлбэрийн шинжтэй явагдаж байна гэдгийг эмч, мэргэжилтнүүд анхааруулж байгаа гэнэ. Тиймээс Эрүүл мэндийн сайдын 358 дугаар тушаалыг үндэслэн тус аймгийн Засаг дарга Баянхонгор аймгийн төв болон сумын хэмжээнд үйл ажиллагаа явуулж байгаа Ерөнхий боловсролын сургуулийн 1-8 дугаар анги, хүүхдийн цэцэрлэгүүдийн үйл ажиллагааг тодорхойгүй хугацаагаар түр, хааж зогсоох захирамж гаргажээ.

Мөн олон нийтийг хамарсан арга хэмжээг энэ сарын 25-наас хоёрдугаар сарын 10-ны өдрийг хүртэл зохион байгуулахгүй байхыг холбогдох байгууллагуудын удирдлагуудад даалгасан байна. Захирамжийн хүрээнд зоогийн газар, бар, рестораны үйл ажиллагааг 21 цаг хүртэл ажиллуулахаар болсон аж.