АНУ-ын 45 дахь Ерөнхийлөгч үл хөдлөх хөрөнгийн тэрбумтан Доналд Трамп ирэх долоо хоногт тангаргаа өргөнө. Тэгвэл саяхан Цагаан ордны гол зөвлөхөөрөө хүргэнээ нэрлэсэн шинэ  Ерөнхийлөгчийн “Тэргүүн хатагтай”-н үүргийг    охин нь гүйцэтгэж магадгүй байна.  Тодруулбал, нөхөр хүүхдүүдийнхээ хамт Цагаан ордонд ойртож, Вашингтон ДС хотод харш худалдан авсан Иванка Трамп хоёр ч компанийнхаа хувьцааг зарж, ажлаасаа гарчээ. 

Эдүгээ 35 настай,  аавынхаа бизнесыг өвлөгч гэгддэг бүсгүй гоёл чимэглэл, гутал, хувцасны чиглэлээр үйл ажиллагаа явуулах компаниасаа гарч,  “Трамп” байгууллагын дэд Ерөнхийлөгчийн албан тушаалаасаа 11 жилийн дараа буужээ. Мөн өөрийн бүх хувьцааг зарснаар компаниас бараг ашиг хүртэх боломжгүй болсон байна.  Тэгвэл гурван ч хүүхдийн эх болох түүний гаргасан эл шийдвэр эцгээ Цагаан ордонд суусны дараа тэргүүн хатагтайн үүргийг гүйцэтгэх  нь гэх цуурхалыг дэвэргэж орхилоо.

Доналд Трампын эхнэр Мелани нөхрөө тангаргаа өргөсний дараа  10 настай хүү Барроныхоо хичээлийн жилийг дуустал Нью-Йоркт  байна гэдгээ өмнө нь илэрхийлсэн. Харин энэ хугацаанд албан ёсны оройн зоог, гадны төлөөлөгчидтэй хийх уулзалт, томилолт зэрэгт Иванка Трамп тэргүүн хатагтайн үүргийг гүйцэтгэх бололтой.