Шинэ жил ойртох тусам хаа сайгүй шинэ жилийн сэдэвтэй дуунууд эгшиглэж байдгийн дотор Шведийн алдарт "АВВА" хамтлагийн "Happy New Year" дуу хамгийн сор нь байдаг гэдэгтэй маргах хүн үгүй биз ээ. Энэ дууг аялахгүй, мэдэхгүй, нэг удаа ч болов сонсч байгаагүй хүн гэж үгүй байх. Хуучин оноо үдэж, шинэ оноо угтах мөчид энэ л дууг сонсохоор шинэ жилийн холбогдолтой гэгээлэг дурсамжууд хөвөрдөг билээ. Мэдээж миний шинэ жил хамгийн түрүүнд хамт олны шинэ жилээр эхэлсэн. Сэтгүүл зүйн салбарынхан бид завгүй их ажлын хажуугаар хуучин оны амжилт бүтээлээ дүгнэж, шинэ оноо угтан баярлах шинэ жилийн баяраа халуун бүлээрээ тэмдэглэнэ гэдэг нэлээд асуудал гээд хэлчихэд хилсдэхгүй.

Учир нь манай хамт олон өдөр тутмын “Монголын мэдээ” сониныхоо хажуугаар www.mminfo.mn сайтаараа цаг, минут тутамд мэдээ мэдээллийг уншигчиддаа хүргэх үүрэг даалгавартай хамт олон. Тиймээс ч жил бүр арванхоёрдугаар сарын 31-тэй  зэрэгцээд л шинэ жилээ тэмдэглэдэг уламжлалтай. Энэ жилийн тухайд манай хамт олны шинэ жил арванхоёрдугаар сарын 28-нд боллоо. Бидний шинэ жил ёстой нөгөө шагнал, сугалаа хоёртоо бялуурсан шинэ жил болсон доо. Газрын диваажин Хайнанд аялах эрх, фитнес клубт явах эрх, аяга, таваг, хундаганы комууд, аяллын цүнх, LCD телевиз гээд шилдэг сайхан шагнал, урмын үг хоёртоо бялуурч шинэ оныг угтлаа.

Өмнөх жилүүдийг бодвол энэ шинэ жил улс орон даяараа уртаас урт буюу дөрөв хоног амарсан. Бүх нийтээрээ амарч байгаа болоод ч тэр үү, миний хувьд 2017 оны шинэ жил цагаан сар шиг л байлаа. Миний ээж хотоос холгүй хөдөө амьдардаг. Тиймээс урт амралтыг далимдуулаад ээждээ эрхлэнгээ шинэ оноо угтахаар би хөдөөг зорив. Урд хөршид амьдардаг бага эгч, Улаанбаатар хотод ажиллаж, амьдардаг ах нар маань ч гэр бүлийн хамтаар шинэ оноо ээжтэй минь угтахаар хамтдаа хөдөө явсан юм. Дашрамд дуулгахад, би дээрээ гурван ахтай, гурван эгчтэй, хоёр ихэр эрэгтэй дүүтэй.

Тэгээд надаас бусад нь гэр бүлтэй болж, 2-3 хүүхэдтэй болсон өнөр өтгөн гэр бүлтэй юм. Тиймээс цэцэрлэг, сургууль, ажил нь амарсан хүмүүс бүгд хөдөөг зорьсон хэрэг. Ингээд ээжийн минь умгар гэр шинэ жилийн үдэш амар мэндээ мэдэлцэх ах, эгч нараас минь гадна, тоглоомоо булаацалдан уйлалдах өхөөрдөм хөөрхөн дүү нарын инээд хөөрөөр цалгих шиг л болсон. Яагаад ч юм би хөдөө гэртээ очих бүртээ бурхан болсон аав минь тосч гарч ирээд үнсэх юм шиг санагдаад, нулимастай нүдтэй л ээжтэйгээ уулздаг болсон. Гэхдээ аавгүй угтаж байгаа хоёр дахь шинэ жилийн баяраараа би ээжтэйгээ уйлж биш, инээж уулзаад ирсэн. Хотын саарал утаанаас гарсан бид хөдөөний цэнгэг агаарт тоглож наадаад, хамаатан садныдаа зочилж, шинэ жилийн бууз чануулж идээд л ёстой цагаан сар шиг шинэ жилийг тэмдэглээд ирсэн дээ.

Ингээд 2017 оны нэгдүгээр сарын 01-ний өдрийг Улаанбаатартаа угтсан юм. Утаатай ч гэсэн улсын нийслэл минь шинэ он гарсан болоод ч тэр үү нэг л сайхан өнгөлөг. Утаанаас болсон уу, яасан ямар ч байсан сүүлийн жилүүдэд шинэ оны анхны нарыг уулан дээр гарч хардаг уламжлалтай болоод байгаа. Тиймээс миний хувьд ч эртлэн босч шинэ оны анхны нар харсан зургаа цахим хуудсандаа байршуулсан найзуудынхаа зургуудыг үзэж, өглөөг угтав. Шинэ оны эхний өдөр дулаахан сайхан өдөр байлаа. Тиймээс ч цанын бааз орж, найзуудтайгаа цасан дээр тоглохоор шийдээд гарлаа. Амралтын өдөр учир цанын баазууд үйлчлүүлэгч олонтой түрээсийн чарга ч олдохгүй байв.

 Нэгэнт зорин очсон учир даараад халуун аарцаа уугаад амарч байгаа гэр бүлийн чаргыг гуйж, хэд сайхан гулгаж авлаа. Нэг үеэ бодвол нийслэлчүүд маань амралт чөлөө цагаа зөв боловсон өнгөрүүлээд сурчихсан юм уу гэж харсан. Учир нь амралтын өдөр ажиллаж байгаа бүх л үйлчилгээний газрууд оочер дараалалтай ачаалалтай байсан ч уур бухимдал багатай зөв боловсон үйлчлүүлж байгаа харагдсан. Улс орны эдийн засаг сайнгүй байгаа талаар дээр дооргүй шуугиж, зарим нэг нь шинэ жил тэмдэглэхийг эсэргүүцэж байсан. Гэхдээ энэ л баяр цоо шинээр эхлэх, ирээдүйн сайн сайхны төлөө тэмүүлэх хүсэл эрмэлзлэлийг хүмүүст өгдөг гэдэгт итгэдэг. Тиймээс ч энэ жилийн шинэ жил ч гайхалтай сайхан болж өнгөрлөө. Та бүхэндээ шинэ оны мэнд дэвшүүлье.