ОХУ-аас Туркид суух онц бөгөөд бүрэн эрхт Элчин сайд Анкара хотод нээгдсэн уран зургийн үзэсгэлэнд оролцох үедээ цагдаагийн ажилтанд буудуулж амь үрэгдсэн хэрэг дэлхий дахинаа өрнөсөн  онцлох үйл явдлын нэг байв.  ОХУ-ын Элчин сайд Андрей Карлов  Туркийн нийслэлд болсон уран зургийн үзэсгэлэнд оролцож, үг хэлэх үед нь гэмт этгээд араас нь буудан амийг нь бүрэлгэжээ.

Энэ үеэр гурван хүн мөн гэмтэж бэртсэн гэх  мэдээлэл байгаа юм. Андрей Карлов  агсныг микрофоны өмнө гарч, ердөө хэдхэн минут үг хэлж байхад нь костьюм өмсч, зангиа зүүсэн этгээд гэнэт “Аллах Акбар” хэмээн хашгирч, найман удаа гал нээжээ.  Хэргийн үйл явцыг харуулсан видео бичлэг ч өчигдөр цахим сайтуудад нийтлэгдсэн байв. 

Гэмт этгээд  “Бид Алеппод үхэж байна. Харин чи энд үх”, “Алеппог мартаж болохгүй, Сирийг битгий мартаарай” хэмээгээд “Хойшоо болцгоо, хойшоо болцгоо. Зөвхөн үхэл л намайг эндээс авах болно. Намайг эсэргүүцсэн хэнийг ч хөнөөх болно” гэх зэрэг үгсийг урсгаж байсныг гэрчүүд мэдээлж байгаа аж.  Залуугийн хэлсэн “Аллах Акбар” гэх үг нь араб хэлээр “Аллах хамгийн агуу” гэх утгийг илэрхийлдэг байна. 

Мөн зарим эх сурвалж, гэмт этгээдийг араб хэлээр “Бид бол зөнч Мухаммадын үр удам” хэмээн хашгирсан хэмээн мэдээлж байв. Харин түүнийг ийн байхад Туркийн нэгэн цагдаа буудан хөнөөжээ. Сирийн арми Алеппо хотыг хэт даврагчдаас чөлөөлөх тэмцлийг эхлүүлж, ОХУ-ын цэргийнхэн агаараас дэмжлэг үзүүлж буй. Энэ үеэр олон энгийн иргэний амь үрэгдэж байгааг хүний эрхийн байгууллагаас удаа дараа мэдээлж байгаа билээ. Ямартай ч, хэрэг гарсны дараа ОХУ ямар хариу үйлдэл үзүүлэх нь олон улсын анхаарлын төвд байлаа.

Харин тус улс хэргийг “Террорист халдлага” гэж үзэж буйгаа тус улсын Гадаад хэргийн яамнаас мэдэгдсэн байна. Ерөнхийдөө Туркид  1990-2010 оныг хүртэл Турк дахь халдлагын гаралт  тодорхой хэмжээнд буурсан ч,  2010 оноос хойш тасралтгүй өссөн үзүүлэлттэй болж ирсэн байна. 

Цэргийн эргэлт хийх оролдлого гарсантай холбоотойгоор онц байдал зарласан тус улсын Истанбул хотод саяхан гэхэд цуврал дэлбэрэлт болж үй олон хүн нас барж, гэмтэж бэртсэн юм. Тэгвэл  ОХУ-ын Гадаад хэргийн яамны төлөөлөгч Мария Захарова “Өнөөдөр Анкараг онилсон террорист халдлагын улмаас Туркид суух ОХУ-ын Элчин сайд Андрей Карлов амиа алдлаа. Бид террист ажиллагаа гэж үзэж байна” хэмээн мэдэгджээ.

Харин Анкара хотын захирагч ОХУ-Туркийн харилцааг зориуд хурцатгах гэсэн зорилготой халдлага байж магадгүй гэж үзжээ. Өмнө нь Сирийн хилийн орчимд нисч явсан ОХУ-ын байлдааны онгоцыг Туркийн тал буудаж унагасан хэрэг хоёр улсын харилцаанд гал авалцуулж байсан удаатай.

Элчин сайдыг буудсан этгээд цагдаагийн ажилтан байжээ

Оросын элчин сайдыг буудан амийг нь хороосон этгээд  Туркийн цагдаагийн шуурхай хариу арга хэмжээ авах хэсгийн албан хаагч байжээ. Тэрээр 22 настай байсан бөгөөд  Туркийн баруун хэсгийн Айдин гэх тосгонд төрсөн,  Анкара хотын цагдаагийн газарт ажилладаг байжээ. Ройтерс агентлагийн мэдээлснээр тэрээр, Анкара хотын Орчин үеийн урлагийн галларейд  албан ажлаар бус буюу хувийн зорилгоор очсон байсан гэнэ.

"HaberTur"k агентлаг  Мевлют Мерт Алтынташ хэмээх энэ этгээд хэдийнэ цагдаагийн байгууллагад ажиллахаа больсон гэдгийг онцолж байна. Учир нь түүнийг долдугаар сард бүтэлгүйтсэн  төрийн эргэлтийн үеэр ажлаас нь халсан байжээ. Тэрээр зургаагаас доошгүй удаа буудсан бөгөөд Алеппотой холбоотой үгнүүдийг хашгирч байсан гэдгийг дээр дурьдсан билээ.

“Сабах” сонинд бичсэнээр түүнийг үзэсгэлэн рүү нэвтрэх үед металл танигч төхөөрөмжийн дохиолол дуугарч эхэлсэн ч, цагдаагийн үнэмлэхээ үзүүлэн зэвсэгтэй чигтээ нэвтэрчээ. Тэгвэл хэрэгтэй холбогдуулан Мевлют Мерт Алтынташын эцэг эх, ах дүүс нарын зургаан хүн баривчлагдсан байна.

Андрей Карлов 2013 онд Туркид суух Элчин сайдаар томилогдож байв

Анкара хотод болсон гэрэл зургийн үзэсгэлэнд оролцохдоо ОХУ-ын Элчин сайд буудуулчихна гэж санаагүй биз. Талийгаачийн хувьд 2013 онд Туркид суух Элчин сайдаар томилогдож байжээ.

Тэрээр 62 настай байсан бөгөөд 1976 оноос хойш дипломатын үүрэг гүйцэтгэж эхэлсэн байна. Мөн 2001-2006 онд Пхеньян дахь ОХУ-ын Элчин сайдаар мөн ажиллаж, үүний дараа Гадаад хэргийн яамны Консулын газрын даргаар тус тус ажиллажээ. ОХУ, Турк хоёр улс сүүлийн үед нягт харилцаатай байх болсон бөгөөд Сирийн асуудалд хоёул сөрөг хүчний эсрэг бодлого баримталж байгаа юм. 

2015 онд Оросын Су-25 онгоцыг Туркийн тал буудаж унагасны дараа түүхэнд байгаагүй хэмжээнд хурцдаж байх тэр үед Андрей Карлов Анкара, Москвагийн харилцааг дахин сайжруулахад өөрийн гэсэн хувь нэмрээ оруулжээ.

Турк дахь АНУ-ын Элчин сайдын яам руу гал нээлээ

Туркид суух ОХУ-ын Элчин сайд гэмт хэрэгтний халдлагад өртөж зуурдаар таалал төгссөний дараа АНУ-ын Элчин сайдын яамыг онилсон халдлага ч мөн болжээ. Анкарад байрлах АНУ-ын Элчин сайдын яамны өмнө өчигдөр өглөө үүрээр буюу 03:50 цагийн үед буун дуу гарч, аюулгүй байдлын үүднээс тус яам түр хугацаанд хаалгаа барихад хүрсэн байна.

Албаны эх сурвалжийн мэдээлснээр,  Элчин сайдын яамны барилгын гол хаалганы өмнө үл таних этгээд ойртон ирж, хэд хэдэн удаа гал нээсэн хэрэг гарчээ. Гэхдээ азаар хүн гэмтэж бэртээгүй бөгөөд гал нээсэн этгээдийг саатуулсан байна.

Энэ хэргээс үүдэн Истанбул, Адана дахь АНУ-ын Консулын газрууд ч гэсэн үйл ажиллагаагаа түр хугацаанд зогсоожээ.  ОХУ-ын Туркид суух Элчин сайд Андрей Карлов агсны  амиа алдсан гэрэл зургийн үзэсгэлэнгийн  замын эсрэг талд АНУ-ын Элчин сайдын яам байрладаг байна.