Германы Бундес лигийн 15 дугаар тойргийн эхний тоглолт өнгөрсөн шөнө боллоо. Одоогоор Бундес лигт хожигдоогүй яваа “Хоффенхайм” клуб талбайдаа хүчирхэг “Боруссия Дортмунд”-ыг хүлээж авч, 2:2-оор тэнцлээ. Ингэснээр хожигдоогүй цуврал нь 15-д хүрээд байна.

Мөн “Хоффенхайм” 27 оноотой болж, гуравдугаар байр руу орж ирлээ. Харин “Боруссия Дортмунд” 26 оноотойгоор 5 дугаар байрт бичигдэж байна. Энэ удаагийн тоглолтын 3 дахь минутад Марк Ут тооны харьцааг нээсэн. Харин 11 дэх минутад Гётце хариуг нь барьсан. Гэвч 20 дахь минутад Сандро Вагнер “Хоффенхайм”-д тэргүүлэл авчирсан бол зочдоос Обамеянг 48 дахь минутад тэнцүүлсэн. Ингэснээр Обамеянг 15 тойрогт 16 гоол орууллаа.