АНУ-ын Эдийн засгийн Форбес сэтгүүл жил бүр  дэлхийн нөлөө бүхий хүнийг тодруулан нэрлэдэг уламжлалтай. Тэгвэл энэ оны хамгийн нөлөө бүхий хүнээр ОХУ-ын Ерөнхийлөгч В.Путин тодорчээ. Тэрбээр дөрвөн жил дараалан тус сэтгүүлийн зарласан рейтингэд ийнхүү тэргүүлж байгаа юм.

Харин хоёрдугаарт АНУ-ын шинэ Ерөнхийлөгч Доналд Трамп эрэмбэлэгдсэн байна. Үл хөдлөх хөрөнгийн магнат энэ оны сонгуульд итгэмээргүй амжилт гаргаж, Ерөнхийлөгчөөр сонгогдсон удаатай. Өмнө нь “Time” сэтгүүл түүний оны хүнээр нэрлэж байсан удаатай. В.Путиныг ийнхүү тэргүүлүүлсэн шалтгаанаа сэтгүүл “ОХУ нөлөөлөл Дэлхийн бөмбөрцгийн бараг бүхий л газарт хүрч тэлж байна.

Эх орноосоо эхлээд Ойрхи Дорнодын Сири, АНУ-ын Ерөнхийлөгчийн сонгуульд хүртэл өөрийн хүссэнээ авч чадаж байгаа учраас хамгийн нөлөө бүхий эрхмээр нэрлэсэн” гэжээ. Харин АНУ-ын 45 дахь Ерөнхийлөгчөөр сонгогдоод сар гаруй хугацаа өнгөрч буй Доналд Трампын тухайд “Дуулиан шуугианд нэр холбогддог ч түүнийг даваад гарах асар их дархлаатай. Конгрессын дээд доод танхимд өөрийн дэмжигчидтэй, хувь хүний хөрөнгө нь ч хэдэн тэрбумд хүртлээ өссөн үзүүлэлттэй гарсан” учир ийнхүү жагсаалтад багтаасан гэж тайлбарласан байх юм.

Харин жагсаалтын гуравдугаарт Германы канцлер Ангела Меркель нэрлэгджээ. А.Меркель ЕХ-ны хамгийн том эдийн засаг бүхий орон Германыг 11 жилийн турш тасралтгүй тэргүүлж, ирэх жилийн сонгуулиар ч гэсэн дахин канцлерт нэр дэвшихээ мэдэгдсэн юм. Түүнчлэн, жагсаалтын дөрөвдүгээрт БНХАУ-ын Ерөнхийлөгч Си Зиньпин нэрлэгджээ.