Монголын хөлбөмбөгийн "ДМЮ" клубийн 12 хүртэлх насны баг БНХАУ-ын Хайнан мужийн Санья хотын өвлийн бэлтгэлийн төвд арваннэгдүгээр сарын 17-ноос арванхоёрдугаар сарын 4-нд болсон тэмцээнд ӨМӨЗО-ны багуудтай өрсөлдөж түрүүллээ. Тус клубийн довтлогч Б.Ууганбаяр зургаан тоглолтод 16 гоол хийсэн амжилтаар тэмцээний шилдэг довтлогчоор шалгарав.

Санья дахь өвлийн бэлтгэлийн төвд жилийн өмнө болсон 12 хүртэлх насны ангиллын тэмцээнд Бразилын алдарт "Флуминенсе" түрүүлж, ОХУ-ын "Чита" үзүүрлэж, "ДМЮ" гутгаар байр эзэлж байсан юм. Монголын клуб энэ удаа Өвөрмонголын хөлбөмбөгийн холбооны урилгаар гурван долоо хоногийн хугацаанд бэлтгэл хийхээр Хайнаныг зорьж, 2015 оны амжилтаа ахиулж чадлаа.