“Хар сарнай” хамтлагийн дуучин С.Амармандах энэ сарын 22-ны өдөр “Жаргалтай Улаанбаатар” цэнгүүнд оролцох үеэрээ ОХУ-ын иргэнд зодуулсан гэх мэдээлэл гарсан.

Тодруулбал, С.Амармандах Хан-Уул дүүргийн 11 дүгээр хороонд байрлах “One event hall”-д болсон арга хэмжээнд дуулах үеэрээ ОХУ-ын дипломат консулын төлөөлөгч Олег Кашин гэгчид зодуулсан хэмээх мэдээлэл олон нийтийн сүлжээгээр явах болсон.

Үүнтэй холбогдуулан С.Амармандахын гэр бүл маргааш 11:00 цагт “Монгол ньюс” мэдээллийн төвд хэвлэлийн хурал хийхээр болжээ. Хэвлэлийн хуралд дуучны гэр бүл болоод урлаг, соёлын төлөөллүүд оролцох юм байна.