Нэр хүнд, цар хүрээгээрээ Аваргуудын лигийн дараа орох Европа лигийн 5 дугаар тойргийн тоглолтууд өнгөрсөн шөнө боллоо. Энэ тойрогт А хэсгийг тэргүүлж байсан Туркийн “Фенербахче” клуб талбайдаа “Заря” клубыг хүлээж авч, 2:0-ээр буулгаж авлаа.

Ингэснээр 10 оноотой болж, хэсгээс гарах боломжтой хэвээр үлдлээ. Гэхдээ 6 дугаар тойргоос эцэслэн шийдэгдэнэ. Тоглолтын 59 дэх минутад Стох тооны харьцааг нээсэн бол 67 дахь минутад Кьер нэгийг нэмжээ.

Нөгөө талд Английн алдарт “Манчестер Юнайтед” клуб талбайдаа Голландын “Фейноорд”-ыг хүлээж авч, 4:0-ээр буулгаж авснаар 9 оноотой болж, хоёрдугаар байр руу орж ирлээ. Мөн хэсгээс гарах боломжоо хадгалж үлдлээ. “Фейноорд” ч гэсэн 7 оноотой үлдэж, дараагийн тойргоос бүх зүйл хамаарах болоод байна.

Тоглолтын 35 дахь минутад Рүүни гоолдож, тооны харьцааг нээсэн. Улмаар Мата 69 дэх минутад нэгийг нэмсэн бол 75 дахь минутад “Фейноорд”-ын хаалгач Брэд Жонс өөрийнхөө хаалганд авто гоол оруулж, Лингард 90 дэх минутад гүйцээжээ.