АНУ-ын шинэ Ерөнхийлөгч Доналд Трамп CBS телевизийн “60 minutes” ярилцлагын нэвтрүүлэгт оролцжээ.  Улмаар энэ үеэр Ерөнхийлөгчийн тангараг өргөснийхөө дараа АНУ-д суурьшсан хууль бус цагаачдыг  албадан гаргана гэсэн амлалтаа биелүүлнэ хэмээн мэдэгджээ.

Түүний тооцоолж буйгаар гурван сая орчим хууль бус цагаач тус улсаас хөөгдөх бололтой.  Тэрбээр “хоёр, эсвэл гурван сая гэмт хэрэгтэн, бүлэглэл, хар тамхины наймаачид гэх мэт хууль бус цагаачдыг  эх орноосоо хөөж, эсвэл  шоронд хорино” гэж ярьсан байна.

АНУ, Мексикийн хилд хана босгох,  хууль бус цагаачдыг албадан гаргах зэрэг нь Доналд Трампын гол амлалтуудын нэг.  Тэгвэл хана босгох талаарх амлалтынхаа тухай ярихдаа тэрбээр “Хилийн зарим хэсэгт хашаа барих болов уу. Гэхдээ хана барихад тохиромжтой хэсэг ч бий. Би иймэрхүү ажилдаа сайн” хэмээсэн байна.