Банкнаас иргэдэд шинээр олгох болон нөхцөлийг нь өөрчлөх хэрэглээний зээлийн өр орлогын харьцааны дээд хязгаарыг 45 хувиар шинэчлэн тогтоов.

Мөн банкуудын төгрөгийн болон гадаад валютын заавал байлгах нөөцийн хувь хэмжээг нэг нэгж хувиар нэмэгдүүлэн 14 болон 19 хувьд хүргэх шийдвэр гаргасан байна. 

Монголбанкны ерөнхийлөгч С.Наранцогт "2025 оны арваннэгдүгээр сарын байдлаар зээл олголт өмнөх оныхоос 21 хувиар өссөн байна. Зээлийн хэрэглээ өсөх нь инфляцыг өдөөх, бизнесийн зээлийг бууруулах, импортыг өсгөн, ханш болон төлбөрийн тэнцэлд дарамт үүсгэдэг. Эдийн засгийн гадаад орчин эрсдэлтэй хэвээр байгаа тул макро орчныг харгалзан Мөнгөний бодлогын хороо дараагийн шийдвэрүүдээ гаргана" гэв.