БНСУ-ын анхны эмэгтэй Ерөнхийлөгч Пак Гын Хегийн багын найз Чой Сун Сил өөрийн байр сууриа ашиглан сандаа их хэмжээний хөрөнгийг хандив нэрийдлээр авч байсан хэрэгт холбогдсон. Улмаар энэ хэрэг нийтэд ил болж эхлэх үед Чой гэгч авлига аваад зогсохгүй тус улсын Ерөнхийлөгчийн улс төрийн үйл хэрэгт оролцон хэлэх үгийг нь хүртэл зааварлаж байсан нь баримттайгаар ил болсон удаатай.

Тэгвэл хэрэг үүнээс ч илүү өргөн хүрээг хамарч магадгүй болж эхэллээ.  Тодруулбал, Ерөнхийлөгчийн Бодлого төлөвлөлтийн ахлах  нарийн бичгийн дарга асан Ан Жон Бонг хэрэгт татаж, албан тушаалаа урвуулан ашигласан гэх үндэслэлээр саяхан байцаасан байна.  Түүний хувьд Чой Сун Силийн хамт соёл, спортын чиглэлээр үйл ажиллагаа явуулах “Мир”, “К спорт” гэх хоёр санг байгуулж, тус сандаа хандив нэрийдлээр мөнгө төвлөрүүлсэн хэрэгт сэжиглэгдэж байгаа. Гэвч Ан Жон Бон анхны мэдүүлэгтээ “Ерөнхийлөгч Пак Гын Хегийн захиалгаар  сан байгуулж, компаниудаас санхүүжилт авсан” гэж мэдүүлсэн байгаа юм.

Тиймээс хэргийг мөрдөх баг БНСУ-ын Ерөнхийлөгч Пак Гын Хегээс  энэ сардаа багтааж мэдүүлэг авахаар төлөвлөж байгаа аж. Телевизээр хоёр ч удаа мэдэгдэл хийгээд амжсан тус улсын Ерөнхийлөгч Пак  шаардлагатай тохиолдолд байцаалт өгөхөд бэлэн гэдгээ илэрхийлээд байгаа билээ.