1,000,000 ам.долларын (3.5 тэрбум төгрөг) шагналын сантай "Intel Extreme Masters Dallas 2025" тавдугаар сарын 19-25-ны хооронд Америкийн нэгдсэн улсын Даллас хотод дэлхийн шилдэг 16 баг оролцсон тэмцээний шигшээ шатны тоглолтууд болж байна.

Тус тэмцээнд уригдаж оролцож байгаа The MongolZ баг хасагдах шатны эхний тоглолтоо Европын холбооны Aurora Gaming багтай тоглож 2-0 (Dust2 13-11, Mirage 13-6) харьцаагаар хожиж IEM Dallas-2025 тэмцээний шилдэг дөрөвт үлдлээ. Тэдний өрсөлдөгч баг нь Европын холбооны MOUZ багтай тавдугаар сарын 25-ны шөнө 02:15 цагт тоглоно. Өмнө нь хоёр баг зургаан удаа таарч тоглоход тавд нь MOUZ хожиж байжээ. Тэд сүүлд дөрөвдүгээр сард болсон IEM Melbourne 2025 тэмцээний А хэсгийн аваргын төлөө тоглож 0-2 (Nuke 7-13, Mirage 9-13) харьцаагаар хожигдож байжээ.

The MongolZ А хэсэгт багтсан бөгөөд эхний тоглолтоо Бразилийн Furai багтай тоглож 2-0 (Anubis 13-7, Mirage 13-7) харьцаагаар хожсон бол хоёр дахь тоглолтоо Европын холбооны G2 Esports багтай тоглож 2-0 (Inferno 13-4, Dust2 13-7) харьцаагаар хожлоо. Улмаар А хэсгийн аваргын төлөө  Европын холбооны Team Vitality багтай тоглож 1-2 (Inferno 10-13, Nuke 13-7, Mirage 13-11) харьцаагаар хожигдож шигшээ шатны тоглолтыг шилдэг зургаагаас тоглосон юм.

The MongolZ багийн бүрэлдэхүүнд дасгалжуулагчаар Баянбатын Эрдэнэдалай /maaRaa/, багийн ахлагч Мөнхболдын Содбаяр /Techno4K/, Бямбасүрэнгийн Гарьдмагнай /bLitz/, Банзрагчийн Өсөхбаяр /910/, Батболдын Аюуш /mzinho/, Мөнхболдын Азбаяр /Senzu/ нар тоглоно.