АНУ-ын “National Geographic” сэтгүүлийн нүүрт нийтлэгдэж, дэлхий дахинаа алдаршсан “Афган охин” алдарт зурагны эзэн болох эмэгтэйг баривчилжээ.  Түүнийг хуурамч бичиг баримтаар Пакистанд амьдарч байсан гэх үндэслэлээр тус улсын цагдаагийн албаныхан саатуулсан юм байна.

“National Geographic” сэтгүүлийн гэрэл зурагчин Стив МакКарри 1984 онд Пакистаны дүрвэгсдийн лагерьт зураг авч явахдаа 12 настай Шарбат Гула гэх охины зургийг авсан байдаг. Улмаар түүний авсан зураг сэтгүүлийн нүүрт нийтлэгдсэнээр дэлхийн хамгийн алдартай зураг болж чадсан юм.

Албаны эх сурвалжийн мэдээлснээр Шарбат Гула 2014 оны дөрөвдүгээр сард Пешавар мужид Шарбат Биби гэх нэрээр Пакистаны биеийн байцаалт авсан байсан аж. Пакистаны мөрдөн байцаагчид түүнд хуурамч паспорт олгосон асуудалд бүртгэл мэдээллийн гурван ажилтан оролцсон байж магадгүй хэмээн сэжиглэж байгаа юм байна.

Учир нь Пакистаны цахимд шилжүүлсэн бүртгэлийн системд Шарбат Гулатай яг ижил биеийн байцаалт авсан Афганистаны дүрвэгсэд хэдэн мянгад хүрсэн  ажээ. Хуурамч паспортын хэрэгт “Афган охин” гэм буруутай нь тогтоогдвол хамгийн ихдээ 14 жилийг шоронд өнгөрүүлж магадгүй гэнэ.