Энэтхэгийн наймхан настай бяцхан охин өөрийн хичээл зүтгэл, чармайлтынхаа хүчээр Гиннесийн номд бүртгэгдэж чадлаа.  Тодруулбал, охин нэг цагт 2787 удаа өнхрөөд Гиннесийн амжилтыг шинэчлэн тогтоож, нэрээ мөнхөлж чаджээ.

Деекша Гириш гэгч найман настай охин өнгөрөгч бямба гарагт Энэтхэгийн өмнөд этгээдийн Бангалорт шүүгчид болон хөгжөөн дэмжигчдэд өөрийн авьяасаа сонирхуулжээ. Охин хоёр гар, хөлөө ачиж, нэг цагийн турш 4.5 км урт үргэлжлэх талбайд нэг ч удаа завсарлага авалгүйгээр 2787 удаа эргэжээ.

Ийнхүү дэлхийн дээд амжилтыг эвдсэн байна. Одоогоос есөн жилийн өмнө 50 гаруй насны америк эр 1330 удаа эргэлдэж, Гиннест бүртгэгдэж байжээ. Харин энэ удаа охин уг үзүүлэлтийг хоёр дахин нугалж, амжилтыг эвдлээ. Охин жил хагасын хугацаанд уг үзүүлбэрт бэлтгэсэн байна.