Удаан хугацаагаар юм идэхгүй өлсгөлөн байхад хүний бие организмд тодорхой хэмжээний өөрчлөлт гарч, улмаар эрүүл мэндэд нөлөөлнө, ийм байдал хамгийн сүүлд хоол идсэнээс хойшхи гурав дахь өдрөөс эхэлдэг гэж судалгаа хийсэн эрдэмтэд энэ дүнгээ эрдэм шинжилгээний Nature Metabolism сэтгүүлд нийтэлсэн байна. Эрдэмтэн судлаачид бүтэн долоо хоногийн турш эрүүл таван эмэгтэй, долоон эрэгтэйг “өлсгөн” ажигласны дүнд ийм дүгнэлтэд хүрчээ.

Ажиглалтаас үзэхэд хүний бие өөрт хуримтлагдсан эрч хүч энергиэ аажмаар алдаж эхэлсэн бол эхний хоёр гурав хоногт л глюкозоо шатааж, сүүлдээ өөх тосоо алдаж эхэлжээ. Туршилтад оролцсон сайн дурынхан энэ долоо хоногийн хугацаанд 5.7 кг өөх тос, бас булчингийн жингээ алдсан байна. Үүний зэрэгцээ судлаач эрдэмтэд туршилттад оролцож өлсөгчдийн үндсэн эрхтнүүд дэх уургийн түвшинд ямар өөрчлөлт орохыг анхааралтай ажиглажээ.

Хэргийн учир нь бие организм дахь энэ бодис тархин дахь нейроны ажиллагааг дэмждэг юм байна. Хоол хүнснээс бүрэн татгалзах, эсвэл мацаг барих маягаар хоолны нарийн дэглэм баримталснаар хүн богино хугацаанд илүүдэл жингээсээ салдаг боловч, бие организм дахь молекулын түвшинд өөрчлөлт гарахад хүргэдэг байна. Тэгэхээр өөрийгөө өлсгөх, хоолны хатуу дэглэм барихаас өмнө өөрийнхөө эрүүл мэндийн байдал, өвчний түүхээ сайтар анхаарч үзэх ёстой гэж эрдэмтэд зөвлөж байна.

Эх сурвалж: Монголын мэдээ сонин

2024 оны гуравдугаар сарын 05. Мягмар. №021 (5939)