Авто замын ослоор дөрвөн хүн амиа алджээ
Улаанбаатар хотын Замын цагдаагийн газрын ЖШУХ дээр өнгөрсөн амралтын өдрүүдэд нийт 529 дуудлага бүртгэгджээ. Үүнээс 367 нь зам тээврийн осолтой холбоотой дуудлага байгаа аж. Мөн гэмт хэргийн шинжтэй 25 гомдол бүртгэгдэж, нэг хүний амь нас хохирчээ.
Тодруулбал, БЗД-ийн нутаг Энхтайваны өргөн чөлөө, Санхүү, эдийн засгийн дээд сургуулийн урд замд H.Sonata маркийн авто машины жолооч А нь явган зорчигч 26 настай эрэгтэй Б-г мөргөж амь насыг нь хохироосон байна. Мөн БГД-ийн нутаг Дунд нолын гудамж, Нарны хорооллын 1-р байрны хойд замд T.Prius маркийн авто машины жолооч С нь унадаг дугуй унаж явсан 07 настай эрэгтэй Т-г мөргөж гэмтээсэн хэрэг гарчээ.
Түүнчлэн хөдөө орон нутгийн замд осол гарах нь ихэссэн талаар Улаанбаатар хотын Замын цагдаагийн газраас мэдээллээ. Тухайлбал, Төв аймгийн Сэргэлэн сум Улаанбаатар хотоос 132-133 дахь км-т асфальтан замд T.Ipsum маркийн гурван зорчигчтой авто машин онхолджээ. Ослын улмаас жолооч 57 настай эрэгтэй З, зорчигч 18 настай эмэгтэй Б нарын амь нас хохирч, нэг хүн гэмтсэн байна.
Мөн Ховд аймгийн Үенч сумын Жаргалант багаас баруун тийш Күв гэх шороон замд Б жолоочтой улсын дугааргүй мотоцикль онхолдож жолооч 38 настай эрэгтэй Б нас барсан хэрэг гарсан аж. Тиймээс Замын цагдаагийн газраас хөдөө орон нутгийн замд хурд хэтрүүлэхгүй байхыг анхаарууллаа.
МЭДЭЭНИЙ СЭТГЭГДЭЛ
ХОЛБООТОЙ МЭДЭЭ
Веб сайтад агуулагдсан мэдээлэл зохиогчийн эрхийн хуулиар хамгаалагдсан тул зөвшөөрөлгүй хуулбарлах хориотой.
Copyright © MMINFO.MN All Rights Reserved. Powered by HUREEMEDIA.
