НҮБ-ын Аюулгүйн зөвлөлийн өчигдрийн хуралдаанаар Ерөнхий нарийн бичгийн дарга Бан Ги Мүний залгамжлагчийг тодруулах байсан билээ.  Тэгвэл уг санал хураалтад  Португалийн Ерөнхий сайд асан 67 настай Антонио Гутеррес олонхийн дэмжлэгийг хүлээж, Ерөнхий ассамблейн хурлаар хэлэлцүүлэхэд санал нэгдсэн байна.

Тэрбээр 10 гаруй жилийн турш  НҮБ-ын дүрвэгсдийн асуудал эрхэлсэн элч төлөөлөгчөөр ажиллаж байсан туршлагатай нэгэн юм. 

Аюулгүйн зөвлөлд санал хураалт болсны дараа Португалийн  нийслэл Лиссабонд Гутеррес илтгэл тавьж, талархсан сэтгэлээ илэрхийлж, дэлхийн хамгийн эмзэг бүлгийн хүмүүст хүрч ажиллахаа мэдэгджээ. 

Ямартай ч, НҮБ-ын тэргүүнээр хоёр удаа улиран сонгогдож таван жилийн турш тус албан тушаалыг хашсан Бан Ги Мүн ирэх арванхоёрдугаар сарын 31-нд албан ёсоор суудлаасаа буух учиртай.  Харин энэ сарын 13-нд болох  НҮБ-ын Ерөнхий ассамблейн хуралдаанаар Ерөнхий нарийн бичгийн албан тушаалд Антонио Гутерресыг томилох эсэх талаарх санал хураалт болох юм.