Засгийн газрын өнөөдрийн хуралдаанаар олон асуудал хэлэлцсэний нэг нь Сэлэнгэ аймгийн Сайхан сумын нутагт орших Хөтөл цемент шохой үйлдвэрийг төрийн өмчид буцаан авах тухай байв. Хуралдаанаар дээрх асуудлыг дэмжиж Засгийн газрын тогтоол гаргажээ. Өмнө нь Шадар сайд С.Амарсайхан "Хөтөлийн цемент шохойн үйлдвэрийг 1.3 тэрбум төгрөгөөр хувьчилж авсан этгээдүүд Хөгжлийн банкнаас 300 орчим тэрбум төгрөгийн хүүгүй, барьцаагүй зээл авсан ч өнөөдрийг хүртэл нэг төгрөг төлөөгүй байна. Улсын аж үйлдвэрийн ууган голомтуудын нэг. Дээрээс нь татвар, нийгмийн даатгалын 20-иод тэрбум төгрөгийн өртэй" гэж байв.