Монголын Үндэсний музейгээс санаачлан "Өглөөний музей" хөтөлбөрийг хэрэгжүүлж байна. Үндэсний музейн гадаа талбайд дэлгэсэн үзмэрт тус музейн хосгүй, өвөрмөц үзмэр болох "Алтай ятга" болон археологийн малтлагаар Хориг уулнаас олж илрүүлсэн ваартай өрөм, шар тос, алтан эдлэл зэрэг ховор нандин олдворыг олон нийтэд сонирхуулна. Түүнчлэн монгол угсаатнуудын хувцасны танилцуулга үзүүлбэр, уламжлалт тоглоом наадгай боловсролын хөтөлбөр, тус музейгээс эрхлэн хэвлүүлсэн ном, каталоги, мэргэжил арга зүйн зөвлөмж, гарын авлага, эрдэм шинжилгээний сэтгүүлийн танилцуулга зэрэг олон талт соёлын ажиллагаа зохион байгуулах юм. Энэ үеэр мөн "Гамма" гэрэл зургийн агентлагтай хамтарсан Ардын хувьсгалын 100 жилийн ойд зориулсан "Гэрлээр бичсэн нэгэн зуун" гэрэл зургийн үзэсгэлэн нээлтээ хийнэ. Монголын түүх, соёл, өв уламжлалыг түгээн дэлгэрүүлж, сурталчлан таниулах зорилготой олон нийтэд зориулсан Улаанбаатар хотын өглөөний гудамж төсөл хэрэгжиж байгаа билээ.