Энэ сарын 24-нд Сүхбаатар дүүргийн VII дугаар хороонд хүн амины ноцтой хэрэг гарсан. Тодруулбал, тус хорооны 11 дүгээр хороололд 30 гаруй насны залуу их хэмжээгээр цус алдсан байдалтай олдсон билээ.

Уг хэргийн дуудлага цагдаагийн байгууллагад үүрийн 05:00 цагт ирсэн бөгөөд хэргийн газарт очиход хохирогч хоолой тус газраасаа цус алдсан байдалтай байжээ. Улмаар түргэн тусламж дуудсан боловч харамсалтай нь залуу амьсгал хураасан байна. Тэгвэл энэхүү хэргийн талаар Цагдаагийн газраас өнөөдөр мэдээлэл хийлээ.

Энэ талаар Улаанбаатар хотын ЦЕГ-ын Гэмт хэрэгтэй тэмцэх ажил эрхэлсэн дэд дарга Ж.Эрдэнэболд “Өнгөрсөн лхагва гарагт Сүхбаатар дүүргийн нутаг дэвсгэрт гарсан хэрэг бол хүн амины хэрэг биш. Урьдчилсан байдлаар мэдээлэл өгье.

Шалгалтын явцад Баянзүрх дүүргийн 13 дугаар хороонд оршин суугч Л нь өөрийнхөө хоолой болон гараа зүсч, өөрийнхөө амийг хорлох оролдлого хийсэн болох нь тогтоогдсон. Энэ цагдаагийн байгууллагын камерт бичигдсэн байгаа. Шалгаж үзэхэд тухайн үед хоолойгоо зүссэн учраас шоконд орсон. Түүнээс болж тэр хавиар цусаа гойжуулж удаан явсан байсан. Шөнийн цагт үйлдэгдсэн учраас хүмүүстэй таараагүй. Амиа хорлох үйлдэл хийсэн нь камерын бичлэгээр нотлогдсон” гэв. Тус хэргийг үргэлжлүүлэн шалгаж байгаа ажээ.