“Гарал угсаа”, “Франц үнсэлт”, “Луйврын хот” зэрэг олон дэлгэцийн уран бүтээлд тоглон, авьяаслаг жүжигчин гэдгээ харуулаад буй жүжигчин Т.Билэгжаргал саяхан монголын кино урлагийн талаарх бодлоо нэгэн сонинд өгсөн ярилцлагадаа хуваалцжээ. Тэрбээр, “Уг нь манай уран бүтээлчид авьяастай, цаанаасаа төрсөн өгөгдөлтэй, нөхцөлийг нь бүрдүүлээд өгвөл кино урлагт бөмбөрцөгийн хаана ч гологдохгүй шүү. Гэхдээ кино урлаг хөгжиж байна уу гэж асуухаар манайхан хөгжиж байна гэдэг. Энэ салбарт сайн төлөөлөгчид байдаг ч цөөхөн. Худлаа яриад яахав, миний ажиглаж байгаагаар манай кино урлаг сүүлийн үед сүйрч байна. Хэллэг, нийгэмд өгч байгаа мессэж, сэтгэлгээ авах юм алга. Хүний тархинд үр тарих биш, хүмүүсийн халаасыг сэгсрэх хүслээр ажиллаж байгаа киночид өөртөө дүгнэлт хийгээд бодох хэрэгтэй. Өөрсдийгөө юу хийж байгаагаа харах, дахин дахин бодох ёстой байна” хэмээжээ.  Сүүлийн үед долоо хоног тутамд сайн, муу кино нээлтээ хийж, кино урлаг үндсэндээ хөгжих бус, сүйрч байна гэж халаглах нэгэн ч байдаг. Тэгвэл тэдний нэг нь Т.Билэгжаргал бололтой. 

Ямартай ч, кино урлагийн салбарт 10 гаруй жил зүтгэсэн жүжигчин энэ жил дөрвөн ч уран бүтээл хийсний нэг нь болох “Нэг өдрийн дайсан” кино өнөөдөр нээлтээ хийх билээ.