Ромын католикийн шашны тэргүүн 80 настай Францисын нүд хөх няц болжээ. Тэрбээр эдүгээ Колумбид айлчилж байгаа юм.

Гэвч өчигдөр парадад оролцож байхдаа санамсаргүйгээр сууж явсан “Popemobile” машиныхаа шилийг нүүрээрээ мөргөсний улмаас зүүн нүд орчим нь хөх няц болсон байна.

Пап Колумбын дөрвөн хотод айлчилсан бөгөөд айлчлалынхаа сүүлийн өдөр Картакенад зочилж, парадад оролцсон юм. Энэ үеэр шашинд итгэгчид рүүгээ гараараа даллаж явжээ. Гэвч, жолооч нь гэнэт тормос гишгэснээс үүдэн тэрбээр гэмтсэн байна.

Үүний дараа папын хөмсөг шалбарч, хацар хэсэг хөхөрсөн байсан ч, пап инээмсэглэн мэндчилсээр байсан гэнэ.

Түүний хэвлэлийн төлөөлөгч Грег Бурк “Пап гэмтэж бэртээгүй. Хөхөрсөн хэсэгт мөс тавьж, анхан шатны эмнэлэгийн тусламж үзүүлсэн. Айлчлал төлөвлөгөөний дагуу үргэлжилнэ” гэжээ.