Хойд Солонгос устөрөгчийн бөмбөг туршсанаа зарласны дараа Цагаан ордон өөрийгөө болон холбоотнуудаа хамгаалахын тулд Пхеньяны эсрэг цөмийн зэвсэг ашиглахад бэлэн гэдгээ зарлажээ. АНУ-ын Ерөнхийлөгч Доналд Трамп, Японы Ерөнхий сайд Шинзо Абэтай өчигдөр утсаар ярьсан байна.

Энэ үеэрээ АНУ холбоотныхоо өмнө хүлээсэн үүргээ биелүүлэхэд бэлэн гэдгээ илэрхийлсэн байна. Цагаан ордон мэдэгдэлдээ “Өөрийн газар нутаг болон холбоотнуудаа дипломат арга замаас эхлээд цөмийн зэвсгийн хүчин чадал хүртэл бүх боломжоо ашиглан хамгаалах үүрэгтээ үнэнч гэдгээ Ерөнхийлөгч Трамп батлан илэрхийллээ” гэжээ.

Д.Трамп ням гарагт твиттер хуудастаа мөн Хойд Солонгостой холбоотой хэд хэдэн мэдэгдэл хийсэн юм. Тэрбээр Пхеньяныг “дайсагнагч, аюул занал” гэж нэрлэсний зэрэгцээ тус улсын бүхий л гадаад худалдааг зогсоохоор төлөвлөж буйгаа мэдэгдээд амжсан байна.