Өчигдөр АНУ Их Британийн колончлолоос тус­гаар тогт­нолоо олсны 241 жи­лийн түүхт ой тохиосон. Ерөнхийлөгчийн ээлжит сон­гуульд ялалт байгуулж, АНУ-ын Ерөнхийлөгч болсон Доналд Трампын тухайд ажлаа авснаас хойшхи анхны Тус­гаар тогтнолын баярын үйл ажиллагаа зохион бай­гуулагдсан юм.

Тэгвэл энэ өдрийн өглөө тус улсад БНАСАУ сануулга өглөө. Өмнө нь Ерөнхийлөгч Доналд Трампын улс төрийн бодлогыг Нацист Германы дарангуйлагч Адольф Гитлерийнхтэй төстэй хэмээн буруушаасан мэдэгдэл хийж байсан Хойд Солонгос улс энэ удаа тив алгасагч баллис­тик пуужингаа амжилттай турш­санаа бахархалтайгаар зар­лалаа.

Долдугаар сарын 4 буюу АНУ-ын Тусгаар тогтнолын баярын өдрийн орон нутгийн цагаар 09:40 цагийн үед  БНХАУ-тай хиллэдэг хойд Пёнган мужийн Банхёны ойролцоогоос Пхеньян тив алгасагч пуужинг Япон тэнгисийн зүг хөөргөжээ.

Пуужин  40 минут орчим нисч,  Японы эдийн засгийн тусгай бүсэд унасан байна.  Харин Пхеньян үүний дараахан мэдэгдэл хийсэн юм. Тус улсын төрийн өмчит KCNA агентлагийн өчигдрийн Онцлох мэдээгээр Үндэсний хувцастай эмэгтэй нэвтрүүлэгч тив алгасагч “Hwasong 14” пуужингийн “түүхэн” туршилтыг тус улсын удирдагч Ким Жон Ун өөрийн биеэр үзэж сонирхсон тухай мэдээлэв.  Пуужин 2802 км-ын өндөрт хөөрч, 933 км зайд тусчээ.

Улмаар Хойд Солонгос улс хамгийн хүчирхэг цөмийн зэвсэгтэй орон төдийгүй дэлхийн хаана ч хүрэх хүчин чадалтай тив алгасагч пуужинг эзэмшиж буйг онцолжээ. Өнөөдрийг хүртэл Ким Жон Ун цөмийн цэнэгт хошуу бүхий АНУ-ын эх газарт тусах чадалтай пуужингийн хөгжүүлэлтэд гол анхаарлаа хандуулж ирсэн билээ. Тиймдээ ч, энэ удаагийн туршилт зүгээр ч нэг алхам биш гэдгийг ажиглагчид онцолж байгаа юм. Энэ он гарсаар тус улс 11 дэх удаа пуужингийн туршилт  хийжээ.

Ким Жон Уны өчигдрийн сануулгад АНУ-ын Ерөнхийлөгч Доналд Трамп ч өөрийн байр сууриа илэрхийлээд амжив. Хэдийнээс твиттер сүлжээний идэвхтэй хэрэглэгч гэгддэг тэрбээр “Хойд Солонгос дахин пуужин харвалаа. Энэ залууд хийх илүү дээр ажил байхгүй гэж үү. Өмнөд Солонгос, Япон улсууд үүнтэй удаан эвлэрнэ гэдэгт итгэхэд бэрх. Магадгүй Хятад улс Хойд Солонгосын эсрэг том алхам хийж, энэ утгагүй явдлыг нэг мөр дуусгах байх” хэмээн жиргэж, бухимдлаа илэрхийлжээ. АНУ-Хойд Солонгосын харилцаа эдүгээ хурцадмал байгаа. Саяхан Хойд Солонгост хоригдож байсан оюутан нас барсны дараагаас улам хурцадсан юм.

Доналд Трампын тухайд БНХАУ-ын даргатай тохиролцсон Хойд Солонгосыг асуудлыг зохицуулах төлөвлөгөө нь бүтэлгүйтсэнийг хүлээн зөвшөөрсөн. Тиймдээ ч, шинэ төлөвлөгөө боловсруулахыг Үндэсний аюулгүй байдлын зөв­лөх­дөө даалгасан гэх мэдээлэл бий. Түүнчлэн, өнгөрсөн долоо хоногт БНСУ-ын шинэ Ерөн­хий­лөгч Мүн Жэ Инийг Цагаан ордонд хүлээн авч уулзсан бөгөөд энэ үеэр мөн Хойд Солонгосын асууд­лыг хэлэлцсэн байдаг.

Гэвч, Мүн Жэ Ин  Пхеньянтай яриа хэлэлцээр хийх саналтай байгаагаа илэрхийлсэн ч, Д.Трамп түүнээс өөр бодолтой байснаар нэгдсэн ойлголцолд хүрч чадаагүй гэдэг. Харин ням гарагт Японы Ерөнхий сайд Шинзо Абэтэй Д.Трамп утсаар ярьж, Хойд Солонгост үзүүлэх шахалтыг улам чангатгахад санал солилцсон удаатай. Мөн удахгүй БНСУ-Япон-АНУ-ын гурван талт уулзалт болж магадгүй талаар Японы мэдээллийн агентлаг дамжуулжээ. Тэдний ярилцах гол сэдэв нь мөн л Хойд Солонгосын эсрэг авах арга хэмжээ бололтой.

Энэ мэтээр АНУ  Хойд Солонгосын эсрэг авах арга хэмжээгээ чангатгахыг эрмэлзэж байх зуурт Пхеньян тус улсын Тусгаар тогтнолын тэмдэглэлт өдрийнх нь өглөө тив алгасагч пуужин харваж, сануулга өгөөд байна.

Дашрамд сонирхуулахад, 1776 оны долдугаар сарын 4-нд Умард Америк дахь Британийн колониуд Пенсильвани муж улсын Филадельфи хотод болсон Америк тивийн хоёрдугаар конгресс дээр Их Британиас тусгаар тогтнохоо зарласан түүхэн баримт бичиг баталж байжээ.  АНУ  гэсэн нэрийг албан ёсоор анх удаа хэрэглэсэн энэ өдөр ийнхүү АНУ-ын Тусгаар тогтнолын өдөр болсон түүхтэй.