Малайзын хамгийн хямд авиа компани болох “Air Asia” компанийн Австрали-Малайз чиглэлийн зорчигч тээврийн онгоц хөөрснөөсөө хойш төд удалгүй шувуутай мөргөлдсөний улмаас ойролцоох нисэх онгоцны буудалд яаралтай ослын буулт хийхээс өөр аргагүй болсон байна. Энэ талаар компанийн тал өчигдөр мэдээлэв.

Ослын буулт хийсэн онгоц нь “Air Asia” компанийн улс хоорондын зорчигч тээврийн “Air AsiaX” загварынх бөгөөд  D7-207 нислэгийн дугаартай аж.

Гэрчүүдийн ярьж буйгаар онгоц Австралийн Голд Костоос Малайзын нийслэл Куала Лампур хотыг чиглэн хөдөлсөн ч, төд удалгүй онгоцонд үл мэдэгдэх чичиргээн үүсч, баруун талын хөдөлгүүр хэсэгт дэлбэрэлт болох чимээ сонсогдсон байна. Тухайн үед онгоцонд 345 зорчигч, нисэх багийн 14 хүн зорчиж явжээ. Улмаар асуудал гарсан даруйд ойролцоох Брисбэйний нисэх буудалд ослын буулт хийсэн байна.
Авиа компани “онгоцны хөдөлгүүр орчмоос хоёр үхсэн шувуу олдсон” талаар мөн мэдээлжээ.