Филиппиний Ерөнхийлөгч Родриго Дутерт долоо хоног орчим хугацаанд олон нийтийг хамарсан ямар ч үйл ажиллагаанд оролцоогүй. Үүнээс үүдэн түүнийг эрүүл мэндийн шалтгаанаар ажлаасаа түр чөлөө авсан гэх мэдээлэл ч гарч байв. Тэрбээр эдүгээ 72 настай юм. Тэгвэл долоо хоног орчим хугацааны дараа Дутерт ажилдаа эргэн орж, олон нийтийг хамарсан үйл ажиллагаанд оролцож эхэлжээ.

Тэрбээр бямба гарагт Минданао аралд зохион байгуулагдсан баярын үйл ажиллагаанд оролцож, энэ сарын 11-нээс хойш анх удаагаа олны өмнө гарсан байна. Тухайн үед сэтгүүлчид түүнээс биеийн байдлыг нь асуухад “Харж байгаа шиг чинь эрүүл саруул байна” хэмээгээд хамгийн сүүлд өнгөрсөн жил л эмчилгээ хийлгэснээ дурьдсан аж.

Эдүгээ Минданао арлын орчимд хэт даврагч “Лалын улс” бүлэглэлийн салбар зэвсэгт босогчид болон Филиппиний армийн хооронд мөргөлдөөн үргэлжилсээр байна.