АНУ-ын Виржиниа мужид бэйсболлын хандивын тоглолтын бэлтгэл ажлын үеэр Бүгд найрамдах намын гишүүдийг буудсан хэрэг гарчээ. Хэрэгтэн цагдаа нарт буудуулж амь үрэгдсэн бөгөөд нас барахаасаа өмнө Ерөнхийлөгч Доналд Трампын аминд халдахаар төлөвлөж байсан гэдгээ илчилсэн байна.

Хэрэг өчигдөр өглөө АНУ-ын нийслэл Вашингтон ДС хотын зах хэсэгт байрлах Александриад гарчээ.

Энэ үеэр Бүгд найрамдах намын парламентын доод танхимын гишүүн Стив Скалисегээс гадна  түүний туслах, цагдаа гээд нийтдээ таван хүн шархадсан байна. Харин гэмт хэрэгтэн цагдаа нартай буудалцах үеэрээ амиа алджээ. Түүний тухайд Иллинойс мужийн Беллевиллед оршин суугч Жэймс Т Ходкинсон гэгч 66 настай хөгшин байжээ.

Тэрээр өнгөрсөн жилийн Ерөнхийлөгчийн сонгуулийн Ардчилсан намын дотоод сонгуульд Төрийн нарийн бичгийн дарга асан Хиллари Клинтонтой өрсөлдөөд ялагдсан сенатч Берни Сандерсыг дэмжигч байсан гэнэ. Тэгвэл энэ явдалтай холбоотойгоор Берни Сандерс байр сууриа илэрхийлж, “Гутамшигтай хэрэг” хэмээгээд жигшин зэвүүцэж буйгаа мөн илэрхийлээд амжсан байна.