Хойд Солонгост өнгөрсөн жил баривчлагдан 15 жил хүнд хөдөлмөр эрхлэх ял сонссон АНУ-ын их сургуулийн оюутан 22 настай Отто Уармбьер суллагдаж, эх орондоо очихоор болжээ. Түүний гэр бүлийнхнийх нь ярьж буйгаар Отто Хойд Солонгосын хорих лагерьт хоригдсон жил гаруй хугацаандаа ухаан алдан унаж, команд орж байсан удаа ч бий гэнэ.

АНУ-ын Төрийн нарийн бичгийн дарга Рекс Тиллерсон Пхеньяны холбогдох албаныхантай яриа хэлэлцээр хийсний дүнд түүнийг суллахаар болсон гэж тайлбарлажээ. Мөн цаашдаа одоо саатуулагдаж буй гурван иргэнээ суллахыг шаардах болно хэмээжээ.

Одоогоор хоёр улсын хооронд ямар хэлэлцээр хийгдсэн, ямар нөхцөлтэйгөөр хоригдож иргэнээ суллуулахаар болсон зэрэг нь тодорхойгүй байгаа юм.